Жақында облыстық Білім беру басқармасының әдістемелік орталығының ұйымдастыруымен “Алтын тұғыр” олимпиадасының облыстық кезеңі өтті. Бастауыш сынып мұғалімдерінің басын қосқан дүбірлі додаға ауданнан 16 педагог қатысып, Жылыойдың намысын жықпай, жеңіспен оралды. «Ұстазы жақсының ұстанымы жақсы» демекші, білікті мұғалімдер білімді оқушыны тәрбиелеп шығары сөзсіз.
Қазақстан Республикасы Білім және ғылым министрлігінің №514 бұйрығына сәйкес жыл сайын дәстүрлі түрде өткізілетін байқаудың түп мақсаты білім ордасының шамшырағына айналған ұстаздардың шығармашылық әлеуеті мен педагогикалық шеберлігін дамыту. Сондай-ақ, мамандығының мәртебесін арттырып, білім беру әдісін жандандыруға көмектесу. Мұғалімдер үшін маңызы зор байқау бұған дейін қараша айында аудандық кезеңде өткен болатын. Оған еліміз бойынша 15 000-ға жуық ұстаз қатысып, 2370-і облыстық кезеңге жолдама алды. Олардың қатарында жылыойлықтар да бар. Бастауыш сынып оқушыларының математика пәніне зейінін ашып, шәкірт тәрбиелеп жүрген №9 мектептің мұғалімі Назира Батырбаева аталмыш байқаудан жүлделі бірінші орын алып, ауданның білім саласына үлесін қосты. Ол өз сөзінде:
- Біздер математика, соның ішінде логикалық есептерді шешу арқылы бақ сынадық. Сайыс өте қызықты өтті. Сұрақтарды жоба ұйымдастырушысының өзі, яғни, халықаралық олимпиада жеңімпаздар жетекшісі, “Зерделі” мектебінің негізін қалаушы Ырысбек Мәуіт құрастырған. 2017 жылы “Үздік педагог” атанған математиктің мұндай байқауы біздің білім деңгейіміздің дамуына жол ашатындығы рас. Жылдан жылға республикамыздан қатысатын мұғалімдер санының өсуі де бұған айрықша дәлел,-деді.
Қазақ және орыс тілдерін қамтыған байқаудың облыстық кезеңіне аттанған аудан мұғалімдері жылды жақсы жаңалықпен бастады десек те болады. Себебі, мұғалімдер арасында топ жарып, жүлделі 1 орынды №9 мектепте ұстаздық етіп жүрген Назира Батырбаева иеленсе, 2 орынды №19 мектептің мұғалімдері Нұржауған Айтқалиева мен Алтынай Есенова және №8 мектептің мұғалімі Бақыт Өтешовалар иеленді. Ал, үздік үштіктің қатарында №21 мектептің мұғалімдері Райгүл Қамысбаева мен Ләззат Дөңбаева, №8 мектептің мұғалімі Ермек Қуанышева, №16 мектептің мұғалімі Ақзер Қозбақарова, №18 мектептің мұғалімі Гүлбике Жолдасова, №4 мектептің мұғалімі Орынгүл Ермекова мен №10 мектептің мұғалімі Дария Бегалылар бар. Олимпиада ережесіне сай әр сыннан сүрінбей өткен ұстаздарымызды жетістіктерімен құттықтаймыз. Ал байқаудың республикалық кезеңі ақпан айының 20-шы жұлдызында өтеді. Оған еліміздің 17 облыс пен 3 мегаполисінің намысын қорғайтын 20 команда қатысады. Облыс намысын қорғайтындар қатарында жерлесіміз Назира Батырбаева да бар.
Д.ДЕРБІС
