Жылыой ауданында алғаш рет «Caravan of Knowledge» корпоративтік қоры «Теңізшевройл» компаниясының қолдауымен интеграцияланған хакатон өткізді.
Онлайн және офлайн форматта өткізілген хакатонға Жылыой және Бейнеу ауданының Боранқұл ауылынан 370-тен астам 7-11 сынып оқушылары қатысты. Олардың ішінде 30-ы жартылай финалға іріктеліп шықты.
Жартылай финалға өткен оқушылар 8-12 сәуір аралығында Құлсары қаласындағы №8 мектепте орналасқан STEAM зертхана базасында хакатонға дайындық – оқыту курстарынан өтті. Курсты арнайы шақырылған əлемдік жарыстардың жүлдегерлері, FIRST робототехника олимпиадасының Қазақстан құрамасының жаттықтырушылары өткізді.
Хакатон қорытындысы бойынша үздік деп танылған «Merge» командасы Алматы қаласында өтетін First-тің дайындық жарысына жолдама алса, абсолютті жеңімпаз деп танылған Құлсары қаласының №8 мектеп оқушыларынан құралған «E=mc2» командасы республикалық FIRST GLOBAL CHALLENGE 2023 ұлттық кезеңіне жолдама алды. Ал ерекше білімі мен тапқырлығымен көзге түскен 3 оқушыға «Меломан» желісінен 10 мың теңгелік сертификат табысталды.
Жылыой ауданы әкімдігінің баспасөз қызметі
