Кітапхана – ғасырдан-ғасырға адамзат тарихының керуенін сүріндірмей әкеле жатқан, шырағы биік парасаттылық пен білімділіктің, байлық пен біліктіліктің киелі ордасы десек, бүгінгі кітапхананы дүниеде ештеңеге теңестірілмейтін білім бұлағы мен тәрбиенің қазығы дейміз. Кітапхана – оқырман мен кітап арасындағы негізгі алтын көпір десек, туындыларын өмірге әкеліп, ұрпаққа құнды дүние қалдырып жүрген ақын-жазушылардың шығармаларын жұршылыққа таныту, насихаттау, жастардың сөз өнеріне, ұлттық руханиятқа ықыласын арттыру да кітапханашылардың басты мақсаты екені сөзсіз.
Жылыой аудандық орталық кітапхана мемлекеттік мекемесінің кітап қоры жылма–жыл ауданымыздың ақын-жазушылары, композиторларының шығармаларымен толықтырылып келеді. Сонымен қатар, аудан тарихы, мәдениеті, өнері, әдебиеті т.б. туралы энциклопедиялық жинақтар, тарихи-тағылымдық кітаптар сөрелерден орын алуда.
Ақын-жазушылардың, сазгерлердің шығармалары аудандық орталық кітапханада ұйымдастырылған «Жылыой: әдебиет әлемі» атты тұрақты кітап көрмесіне қойылып, күнделікті насихатталуда. Сонымен қатар, өткен жылы Жылыой ауданының 95 жылдығына орай «Жылыой – асылдар туған, шежіре тұнған құт мекен» атты кітап көрмесі ұйымдастырылып, ауданның тарихы, мәдениеті, әдебиеті, өнеріне арналған ақын- жазушылардың шығармаларына, энциклопедиялық жинақтарға, тарихи-тағылымдық әдебиеттерге библиографиялық шолу жасалды. Іс–шараға колледж студенттері мен №1, №5, №7, №8 мектептің жоғары сынып оқушылары, ауданымыздағы Соқырлар қоғамы, Мүгедектер қоғамы, Провация бөлімі қатысты. Бұл кітап көрмесі Ақтауда өткен Жылыой ауданының мәдени күндерінде де ұйымдастырылып, насихатталды. Сондай-ақ, мекемеге қарасты барлық ауылдық, қалалық кітапхана бөлімшелерінде де әртүрлі бағытта, офлайн және онлайн форматта іс-шаралар өткізіліп келеді. Жыл сайын ақын-жазушылардың шығармаларын насихаттау барысында кездесу, портрет кештері ұйымдастырылады. Мақсаты – оқырмандарға ауданымыздың ақын-жазушыларының, сазгерлердің өнегелі өмір жолын, шығармаларын кеңінен насихаттау және оқуға ұсыну.
Орталық кітапханада ауданымыздың ұлағатты ұстазы, абыз ақсақалы, шежіреші, ақын Жанаш Нұрмаханның 100 жылдық мерейтойына орай еске алу мақсатында «Кең Жылыойдың абызы» атты тақырыпта портрет кеші ұйымдастырылды. Кешке абыздың шәкірттері, ұрпақтары қатысып, естелік әңгімелерімен бөлісті. Оқушылар ұстаз-ақынның өлеңдерін, ұстазға арналған өлеңдерді мәнерлеп оқыды. Кеш соңында ұлағатты ұстаз, абыз ақсақалдың ұрпағы Жанат Жанашқызы әкесі Ж.Нұрмахан туралы жазылған «Ұлт болмысы» атты журналды кітапханаға сыйлады. Бұл журналдан Ж.Нұрмахан туралы толық мағлұмат алуға болады.
Сондай-ақ, ақын, ҚР Жазушылар одағының мүшесі Бүркіт Базарбаевпен «Ақын – елдің ардағы» атты тақырыпта кездесу кеші ұйымдастырылды. Бұл шараға Т.Байсырымов, С.Өтебаев атындағы колледж студенттері, №15 мектеп оқушылары аудандық Жастар ресурстық орталығы атсалысты. Ақын өлеңдері оқылып, толғаулары, сөзіне жазылған әндер шырқалды. Өте әсерлі кеш болды. Сонымен қатар Жазушылар және Журналистер одағының мүшесі, Жылыой ауданының құрметті азаматы, қаламгер Қонаш Қалдыоразұлының 80 жылдық мерейтойына орай «Қаламы қарымды қаламгер» тақырыбында кездесу кеші өтті. Кешті ақын Б.Базарбаев жүргізді. Оған ҚР Жазушылар одағы Атырау облыстық филиалының төрағасы болған Қ.Жылқышиев қатысып, ақынға медаль табыстады. Кітапхананың оқырманға қызмет көрсету бөлімі кейіпкеріміз Қ.Қалдыоразұлының өмірі мен шығармашылығына арналған бейне шолуды оқырман назарына ұсынды. Кеш барысында жазушы өзінің жаңа туындыларын кітапханаға сыйлады. Осындай тағы бір әсерлі кеш ақын Л.Сисекеновтың 75 жас мерейтойына орай ұйымдастырылды. «Жылыойдың арқалы ақыны» деп аталған шарада ақын өлеңдері оқылып, оның сөзіне жазылғанқ Қ.Бекеновтың «Кең Жылыойым» әні орындалды. Ақынға арнау өлеңдер оқылды. Ал «Жылыойым – жыр сыйлаған кең мекенім» атты тақырыпта М.Сатыбалдиев атындағы сыйлықтың лауреаты, мұнайшы ақын Амандық Сасаевпен және Жылыой ауданының құрметті азаматы, журналист, мәдениет саласының ардагері Нұрдәулет Ақназаровпен кездесу кеші өтті. Кеш барысында ақын мен журналист өмірі мен қызметіне арналған бейнесюжет көрсетілді. Ақын өлеңдері оқылып, журналистің жарияланған әңгіме, мақалалары туралы айтылды. Қонақтар оқырман сауалдарына жауап берді. Кеш соңы өнерлі жастардың сазды сәлеміне ұласты.
"Мақаланың жалғасын " Кең жылой" басылымынан оқи аласыз"
Б.Кенжебекова, аудандық орталық кітапхана ММ директоры
