Құлсары қаласында алғаш рет «STEAM FAIR ZHYLYOY» атты ғылыми білім беру фестивалі өтті. Оның өтуіне «Caravan of Knowledge» корпоративтік қоры мұрындық болып, қолдау көрсетті. Фестивальге аудандағы жаратылыстану пәніне қызығушылығы мол оқушылар мен ұстаздар қатысты. Жалпы «Теңізшевройл» компаниясының қолдауымен ашылған «ZHYLYOY STEAM MEKENI» - біздің аудан мен Боранқұл ауылында ғылымды, сондай-ақ заманауи технологияларды, робототехниканы насихаттауға арналған және STEAM бағытында білім беріп келе жатқан ерекше әрі болашағы зор жоба.
Фестивальдің ашылу салтанатында алғаш сөз сөйлеген облыстық білім басқармасының басшысы Ерлан Сламбеков мұндай шараның Атырау қаласында өткенін, енді Жылыой ауданында ауқымды түрде ұйымдастырылып отырғанын айтып, қатысушыларға сәттілік тіледі. Оны жаратылыстану бағыты бойынша қосымша білім алғысы келетін оқушылардың көбейгені қуантты. Осындай жастар барда еліміз дами беретініне сенім білдіріп, ұйымдастырушыларға алғысын білдірді.
"Теңізшевройл" ЖШС Үкіметпен және қоғаммен байланыс жөніндегі бас менеджері Дармен Аронов білім беру жүйесін қолдау – ТШО-ның әлеуметтік бағдарламаларының басым бағытының бірі болып табылатынын жеткізді.
-Біз болашақты білімді жастардың қолында деп санаймыз және әлеуметтік жауапты компания ретінде біздің қызметкерлер мен олардың отбасылары тұратын және жұмыс істейтін Жылыой ауданының дамуына өз үлесімізді қосамыз,-дей келе аудандағы «ZHYLYOY STEAM MEKENI» жобасының дамуына үлес қосып жатқан бірқатар мұғалімдерді алғысхатпен марапаттады.
"Білім керуені" КҚ басшысы Зарина Биюмбаева фестиваль және жобаның бір жылдағы қорытындыларымен бөлісті:
-«STEAM Fair Zhylyoy» - бұл Жылыой ауданын дамыту бағдарламасы шеңберінде іске асырылған жоба. Сондықтан бүгінгі шара аудан үшін маңызды оқиға саналады. Жергілікті атқарушы орган мен ТШО компаниясының қолдауымен STEAM зертханасын жарақтандыру, бейімделген оқулықтарды дайындау, ЖМБ педагогтары мен оқушылар үшін жылдық циклдің білім беру бағдарламасын жүргізу сияқты кешенді шаралар іске асырылды. Аймақтың пәнаралық көзқараста үлкен әлеуеті бар. Біз мұны FIRST халықаралық жарысының республикалық деңгейіне дейін өткен оқушылар командалары мен ел деңгейіндегі жобаларға қатысатын белсенді педагогтардың деңгейінен анық көреміз. Бұл іс-шараның мақсаты - біз бірге қаншалықты көп жұмыс істегенімізді және қаншалықты алысқа бара алатынымызды көрсету, әр оқушыға, ата-анаға, мұғалімге, мектеп пен аймақ басшылығына өңірдің бәсекеге қабілеттілігіне қосқан үлесі үшін Алғыс айту. 2023 жылдың қорытындысы бойынша Жылыой ауданы Қазақстандағы STEAM даму картасында өзінің лайықты орнын алды,-деді мақтанышпен.
Фестиваль бір күн бойы «ZhasSTEAM» және «Steam Ustaz» аталған екі бөлім бойынша өтті. Қазақстанның түкпір-түкпірінен шақырылған спикерлердің ішінде физика олимпиадасының әлем чемпионы Ернұр Рысмағамбетов, STEAM мектептеріндегі Медиа менеджмент саласындағы сарапшы Ануар Онайбеков, «COSMOS NPIO» КЕҰ директоры Александр Лукашевичтер болды. Спикерлер баланың дамуына қандай факторлар әсер ететіні туралы айтып, «Contest based learning» әдістемесі деген не?» және бәсекелестік рух, жеке қасиеттер мен білімді жақсарту үшін не істеуге болатыны туралы ақыл-кеңесін айтты.
Сонымен қатар ауданның мұғалімдері де тренинг өткізді. Олар бір жыл ішінде «Zhylyoy STEAM Mekeni» жобасы аясында робототехника, жаратылыстану-ғылыми пәндер мен математика мұғалімдерінің біліктілігін арттыру секілді басқа да бағдарламаларда оқыған. Робототехника бойынша команданың жаттықтырушысы, «FGC Central Asia» финалисті Нұрсауле Төлеуова, математик, YouTube блогері Жамбыл Кабдешев, математика пәні мұғалімі Амангүл Тажбенова, биология пәні мұғалімі Мадина Сагынғалилар жаңа технологиялар мен робототехника туралы, YouTube баланың білім алуына қалай көмектесе алатындығы және технологиялардың объективі арқылы математика мен биологияға жаңа көзқараспен қарауға болатындығы жайлы айтып берді.
Фестиваль аясында FIRST робототехника бойынша халықаралық жарыстың облыстық кезеңі өтті. Бұл - жыл сайын әлемнің түкпір-түкпірінен келген әр түрлі жастағы балаларды жинайтын халықаралық турнир «FIRST Global Challenge» жарысы. Фестиваль 10-16 жас аралығындағы балаларға арналды және оған 10 команда қатысты.
№8 мектептің оқушылары фестивальда, әсіресе робототехника туралы айтылған ақпараттардың ұнағанын айтып жатыр.
-Фестивальде роботтар мен технологиялар туралы көбірек айтылатынын және бұл шара бізге шексіз мүмкіндіктер әлеміне есік ашатын білім сиқыры екенін білдік,-дейді олар.
П. ТҮРКЕНБАЙҚЫЗЫ
