Облыстық Білім беру басқармасының «Таланттарды анықтау және қолдау» орталығының ұйымдастыруымен Атырау қаласында арнайы конкурс өтті. Онда 2023-2024 оқу жылында жақсы нәтиже көрсеткен үздік білім ордалары мен ұстаздар, оқушылар анықталды. Қорытындысында біздің аудан да үздіктер қатарынан көрінді.
Атап айтсақ, «Үздік 20 мектеп» номинациясына Құлсары қаласындағы №16 Д.Жазықбаев атындағы және Жем ауылдық округіндегі №4 М.Әуезов атындағы орта мектеп кіріп, аудан абыройын асқақтатты. Бұл аталған үздік оқу ордаларының оқушылары – аудандық, облыстық, республикалық пән олимпиадалары мен ғылыми жобаларда жүлделі орындарды иеленіп, білім биігін бағындырып жүрген шәкірттер қатарында.
Ал, «Талантты ұстаз – 2024» номина- циясымен №3 мектептің мұғалімі Ғалия Боранқұлова марапатталды. 31 жыл еңбек өтілі бар педагогтың оқушысы Бейбарыс Сағынбай «Дарынды оқушы – 2024» атағын жеңіп алды. Бейбарыс туралы бұған дейін де газетімізде жазған болатынбыз. Ол биыл республикалық «Махамбет оқулары» байқауының жеңімпазы атанған еді. Осылайша облыс бойынша үздік атанған Қара Арна ауылдық округі мектебінің ұлағатты ұстазы мен шәкірті өз ауылының ғана емес, ауданымыздың мәртебесін бір көтеріп тастады.
П.ҚИЗАТОВА
