Аудан әкімі Жұмабек Қаражанов Майкөмген ауылының тұрғындарымен кездесіп, атқарылып жатқан жұмыстар туралы ақпарат берді. Кездесуге аудан əкімінің орынбасарлары, дербес бөлім басшылары, құқық қорғау орган өкілдері және коммуналдық қызмет көрсетуші мекемелер басшылары қатысты.
Жыл басынан бері бұл ауылда 3 кездесу ұйымдастырылып, 22 мәселе көтерілген. Оның ішінде 6 мәселе орындалып, 6-ауы бойынша объективті жауап берілген. Қалған 7 мәселе бойынша жұмыстар атқарылып жатса, 4 мәселе шешімін таппаған.
Қазіргі таңда Майкөмгенге интернет спутнигі орнатылып, алдағы айда тұрғындар осы жұмысты атқарып жатқан мекемемен келіссөз жүргізіп, интернетті үйіне дейін қондыра алытынын жеткізді. Ал ауылға жаңа мектептің керек екенін айтқан тұрғындарға Ж.Байрақбайұлы мәселенің шешімін тауып отырғанын айтты. Облыс әкімі С.Шәпкеновтың өзі де мектепті көріп кеткенін, енді облыстық Құрылыс басқармасымен бірге жоба жасалып, жақын арада сараптамадан шығатынын хабарлады. Сараптама қорытындысынан кейін алдағы уақытта мектептің құрылысына қаражат көзін қарастыратындарын мәлім етті.
Жарық мәселесіне тоқталған аудан басшысы алдағы 1 айда жұмыс бітіп, тапсырылуы тиістігін атап өтті. Ал ауылдағы құм көшкінін тоқтату мақсатында сексеуіл егуге 800 шаршы метр жердің сметасы дайындалып жатқанын, келесі жылға ақшасы қаралатынын жеткізді. Ауыл ішіндегі асфальт жолға келсек, жалпы жабындысы төселген, үстіңгі қабатын келер жылы жасап бітіретінін айтып, майкөмгендіктерді қуантып қойды.
Аудан басшысы бұдан соң ауыл халқының талап-тілектерін тыңдады. Тұрғындар өздерін толғандырып жүрген бірқатар мәселелерді көтерді.
П.ТӘЖІ
