Кітап – адамзаттың сан ғасырлық парасаты мен тәжірибесін бойына жинаған рухани қазына. Ол үн қатпай сыр шертетін тәрбиеші, ойға жетелейтін ұлы ұстаз, ақыл мен білімнің сарқылмас бұлағы. Адам баласының ғасырлар бойғы ең ұлы жаңалықтары мен терең пайымдары, өмірлік құндылықтары мен таным-түсінігі кітап арқылы ұрпақтан ұрпаққа аманат болып жетіп отыр.
Бүгінде кітап оқу мәдениетін нығайту, ұлттық әдеби мұрамызды кең көлемде насихаттау және ұлт құндылықтар тұғырын бекіту мақсатында әр буынның рухани талғамын ескеріп, 23 сәуір мен 23 шілде аралығында жалпыхалықтық сауалнама жүргізілді. Әдебиет сүйер қауымды бір арнаға тоғыстырған бұл игі бастаманың қорытындысы 10 тамыз - Ұлы Абай күні қарсаңында жарияланбақ. Ал сауалнаманың басты мақсаты – төл әдебиетіміздегі оқырман жүрегінен орын алған 100 көркем туындыны анықтау. Бұл жалпыұлттық бастама арқылы халқымыздың рухани талғамын таразылап, әдебиетіміздегі шынайы құндылықтарды айқындап көрсету.
Жоба аясында елге танымал тұлғалар, ақын-жазушылар, кітапхана оқырмандары өз таңдауын ұсынуда. Солардың бірі – ақын, журналист, Журналистер одағының мүшесі, ауданның Құрметті азаматы, №2 қалалық кітапхананың белсенді оқырманы Бүркіт Базарбаев. Ол өз тарапынан халық оқуға тиіс деген 10 кітапты ұсынды. Туындылардың қатарында қазақ әдебиетінің асыл қазынасына айналған, оқырман жүрегінен берік орын алған көркем шығармалар бар. Атап айтқанда, Дулат Исабековтің, Әбіш Кекілбайұлының, Мұхтар Мағауин мен Мұхтар Әуезовтің шығармашылығы, сондай-ақ Төлен Әбдікұлының терең философиялық мазмұндағы «Парасат майданы» секілді ерен еңбектер ұсынылған. Бұл шығармалар – ұлттық әдебиетіміздің биік рухы мен көркемдік шеберлігін айқын танытатын маңызды дүниелер.
Иә, қазақ әдебиеті – халқымыздың жүріп өткен жолының, асыл арманы мен өр рухының көркем шежіресі. Ұлт болып ұйысудың, ел болып еңсе тіктеудің бірден-бір жолы – рухани байлығымызды бағалау, сақтау және насихаттау. Осы мақсатта қолға алынған «100 кітап» жалпыұлттық сауалнамасына аудандық орталық кітапханаға қарасты барлық руханият ордалары бір кісідей атсалысу үстінде. Кітапханашылар, тіпті, көшеге шығып жергілікті жұртшылыққа сауалнама жүргізіп, әлеуметтік желілер арқылы бұл шараның маңыздылығын түсіндіріп келеді.
«100 кітап» жалпыұлттық сауалнамасы тек әдеби бастама ғана емес, ұлттың рухани тамырына жасалған терең үңіліс, өскелең ұрпақтың жан дүниесін байытар мәнді мәдени жоба. Бұл бастама арқылы халық өз әдеби талғамын ашық білдіріп, қай қаламгердің, қай шығарманың ұлт жадына терең сіңгенін көрсетті. Сонымен қатар әдебиетке деген жаңа көзқарас қалыптастырып, оқырман мен кітап арасындағы байланысты қайта жаңғыртуға жол ашты.
Жинақталар нәтижелер – келер ұрпақ үшін баға жетпес рухани бағдар. Оның «Ұлы Абай күнімен» қатар жариялануы – әдебиеттің ұлт болмысындағы маңызын тағы бір мәрте айшықтай түседі. Ұсынылған әр шығарма – тек көркем дүние ғана емес, қазақтың жан айнасы. Сондықтан бұл жобаның ең үлкен жетістігі – халық пен әдебиетті қайта табыстыруында. Әдебиетке деген жанашырлық – ел болашағына деген жанашырлық. Ендеше, жүректі тербеп, санаға сәуле құятын шығармаларды бірге оқиық, бірге бағалайық!
Әйгерім Ғалымжан, ҚазҰУ студенті
