Бүгінгі таңда Әл-Фараби атындағы Қазақ Ұлттық Университеті тек Қазақстан Республикасы мен Тәуелсіз мемлекеттер достастығы жоғары оқу орындарының арасында ғана емес, халықаралық рейтингте де жетекші орынға ие. Өйткені QS жаһандық рейтингісінде 165-орынға көтеріліп, халықаралық ғылым және білім кеңістігінде өзінің әлемдік көшбасшы университеттер қатарында екендігін дәлелдеді.
Университетіміздің негізін қалап, өркениетті дамуында біздің Қаржы және есеп кафедрасының үлесі мол. Бұл бухгалтерлік есеп және аудит, қаржы саласында бәсекеге қабілетті, жоғары білікті мамандарды дайындайтын ең мықты кафедралардың бірі болып есептеледі. Есеп және аудит білім бағдарламасымен оқитын студенттер оқыту үдерісінде тек қана аймақтың және еліміздің еңбек нарығының қажеттілігін қамтамасыз ететін қаржы-банктік жүйедегі жоғары білікті мамандар даярлайды. Олар оқу процесінде теориялық және тәжірибелік білімге ғана емес, сонымен қатар ғылыми зерттеу әдістеріне де ие бола алады.
Бухгалтер мен қаржыгердің кәсіби мүмкіндігі мамандандырылған құрылымдарда, яғни мемлекеттік органдарда, меншіктің барлық формасындағы мекемелер мен ұйымдарда, нарықтық инфрақұрылымның бөлімшелеріндегі экономиканы мемлекеттік реттеуді басқару органдарында, ғылыми-зерттеу мекемелерінде кең таралған.
Осы мамандықтар бойынша оқыту кезеңінде алынған білім жоғарыда аталған қызмет түрлерімен нәтижелі айналысуға мүмкіндік беріп қана қоймайды. Болашақта бухгалтерлік есептің қазақстандық жүйесінің теориясы мен тәжірибесіндегі мүмкін болатын өзгерістерге бейімделуге, кәсіби әлеуетті жоғары дәрежеде жүзеге асыруға қажетті жеке қабілетімен және азаматтық белсенділігімен жоғары кәсіби деңгейдегі әлеуметтік құзыреттілікті үйлестіруге, жауапкершілікті алуға дайын болуға, ұйымдастырушылық қасиеттермен жоғары жетістікке ұмтылуға, өзіндік дамуға көмектеседі.
Кафедра оқытушылары Сингапур, Германия, АҚШ, Швейцария, Оңтүстік Корея, Қытай шетелдік жоғары оқу орындарынан ғылыми тағылымдамадан өтті. Сонымен қатар кафедра оқытушылары оқу пәндері бойынша оқу әдістемелік құралдарды жасақтайды және баспадан шығарады. Студенттер қосымша әдістемелік және оқу көмекшілері ретінде электрондық оқулықтарды пайдаланады.
Бүгінгі таңда біздің кафедрамыз қаржы және есеп саласындағы білікті жетекші түлектерді тәрбиелеуде. 2009 жылдан бастап ТМД және ШЫҰ Желілік университеті аясында Ресей халықтар достастығы университетімен бірігіп, бухгалтерлік есеп және аудит, қаржы мамандықтары бойынша магистрлерді дайындауда қос дипломды бағдарламасы жүзеге асырылуда. Яғни, жас талапкердің магистратура білімін алу кезінде бірден екі диплом алып шығуына мүмкіндігі бар.
2014 жылдан бастап Ғылым Ордасымен бірігу аясында Қазақстан Республикасы Білім және ғылым министрлігі қаржы және есеп бағдарламалары бойынша магистрлер мен PhD докторларды дайындайды.
Осылайша жыл сайын жас мамандар қалыптастырып отырған жас кафедрамыз еліміз үшін бәсекеге қабілетті мамандарды дайындауға өз үлесін қосып келеді.
Әсел КИСЫМАНОВА,
Әл-Фараби атындағы ҚазҰУ-нің «Есеп және аудит»
мамандығының 4-курс студенті,
Оксана КОГУТ,
аға оқытушы
