Осыдан дәл 20 жыл бұрын Қамыскөлдің арғы беті жапан түз еді. Қаланың 9-учаске тұрғындарының мал жаятын жері, көл жағалауы көпшіліктің жазда суға шомылып, демалатын «жабайы пляжы» болды. Ал қазір бұл бөлік адам танымастай өзгерген. Жеке тұрғындардың күшімен жаңадан бір емес, екі бірдей «Береке» ықшамауданы бой көтерді. Қосқабатты 280 орындық балабақша салынды. Енді, міне, 600 орындық жаңа мектеп құрылысы да аяқталды.
Оқу ордасы құрылысының басталғаны күні кеше секілді еді. Былтыр қолға алынған ауқымды жоба «Теңізшевройл» компаниясының қаржыландыруымен межелі мерзімде салынып бітті. Ықшам ауданның көрнекті жерінен көз тартып тұрған сәулетті ғимараттың ішкі-сыртқы келбетімен таныспақ ниетпен «Береке» ықшамауданына бет алдық. Бізді «АВС-ЛИМИТЕД» жауапкершілігі шектеулі серіктестігінің жоба менеджері Ерназар Құспанов қарсы алды.
Алдымен, аумағы ат шаптырым алқапты алып жатқан оқу ордасының ауласын көрдік. Мектеп оқушыларының футбол, баскетбол, волейбол ойнайтын алаңдары, гимнастика жасап, ұзаққа секіретін және 250 метрге жүгіретін жерлері бар. Жағалай жас шыбықтар егілген, демалыс орны да қарастырылған. Жалпы мектеп ғимараты үш блоктан тұрады. Біз кірген ортаңғы блок – үш қабатты, онда асхана бөлмесі, оның үстінде спорт зал, ал ең жоғарғы қабатында акт залы орналасқан. Сол қанаттағы А блогы да үш қабатты болып шықты. Онда 5-11 сыныптарға арналған өз алдына оқу ғимараты болса, оң қанаттағы В блогы бастауыш мектепке арналған екен. Ол - қос қабатты. Барлық блоктағы сынып бөлмелері заманауи талапқа сай жабдықталған. Директор, мұғалімдер бөлмесі, зертхана, дәрігерлік кабинет, әжетхана секілді қосымша бөлмелер де жетерлік.
Біз мектеп ішін аралап жүріп, тарих пәніне арналған сынып бөлмесіне бас сұқтық. Онда өзін Ғалымжан деп таныстырған суретші жігіт ішін безендіруде екен. Майлы бояумен сынып бөлмесінің қабырғасына ат үстіндегі қазақ батырының бейнесін салып, ежелгі қазақ хандығының картасын сызып жатыр. Ал сынып бөлмелері қазіргі талапқа сай су жаңа парта, орындық, үстелдермен және жиһаздармен жабдықталған. Өзге сыныптар да жылы да жайлы көрінді. Тіпті, сынып бөлмелеріне тарихи тұлғалардың портреті мен көрнекі құралдарды да дайындап қойыпты.
- Қазіргі таңда мектеп құрылысы толықтай аяқталды. Тапсырыс беруші – облыстық құрылыс басқармасы. Күні бүгін ішінде тазалық жұмыстары мен өзіңіз көргендей сынып бөлмелерін безендіру, әзірлеу процесі жүріп жатыр. Бір сөзбен айтқанда, оқу ордасын тапсыруға дайындық үстіндеміз,-дейді Е.Құспанов.
Ресми емес ақпарға қарағанда, мектептің ашылу салтанаты Тәуелсіздік күніне орай ұйымдастырылады деген болжам бар. Егер шынымен де, «Береке» ықшамауданынан бой көтерген заманауи үлгідегі жаңа мектеп сол мерекеде ашылса, бұл сөз жоқ, ТШО мен құрылыс мекемесінің ел тәуелсіздігі мерекесіне жасаған тартуы болары сөзсіз.
Өз тілшімізден
