Биылғы оқу жылынан бастап 2023-2025 жылдарға арналған «Біртұтас тәрбие бағдарламасы» іске асырылуда. Бұл құжат жалпы адамзаттық және ұлттық құндылықтар негізінде өскелең ұрпақты тәрбиелеу сапасын арттыруға бағытталған. Себебі, қазіргі таңда жастардың бойында ұлттық сананы қалыптастырудың маңыздылығы бүгінгі күннің өзекті мәселесінің біріне айналып отыр.
Осы орайда білім бөліміне қарасты 20 мектепте «Біртұтас тәрбие бағдарламасы» жүзеге асырылып, тәрбие құндылықтарына арналған кешенді жоспар бойынша жұмыстар жасалу үстінде. Онда ұлттық мүдде, ар-ождан, ризашылық, қайырымдылық, ынта-жігер сынды адами қасиеттер білім беру ұйымдарының барлық тәрбиелік жұмысының мазмұнында көрініс табуы тиіс. -Бұлардың барлығы тәрбие сағаттары мен тәрбиелік шаралар арқылы насихатталады. Қазақстан Республикасының Оқу-Ағарту министрлігінің «Адамды үйлесімді дамуы Ұлттық институтының» нұсқаулығы бойынша аудандағы барлық мектепте «Ата-аналарды педагогикалық қолдау орталығы» ашылды. Берілген нұсқаулыққа сәйкес әр ай сайын жас ерекшеліктеріне сәйкес сабақтар өткізіліп, тренингтер ұйымдастырылып, атқарылған шаралар уақытылы әлеуметтік желіге жүктеліп отыр. Оның ішінде «Даналық мектебі» клубы өз жұмысын жүйелі жүргізуде. Клуб мақсаты: аға буынның педагогикалық әлеуетін өзектендіру арқылы ата-аналардың позитивті мәдениетін дамытуға жәрдемдесу. Әрбір қызмет бағытының орасан зор педагогикалық әлеуетін ескере отырып, білім беру ұйымдарында клубтың барлық 4 секциясын ашу ұсынылды. Яғни, олар «Ата өсиеті», «Әже даналығы», «Аға қамқорлығы», «Жеңге кеңесі» деп аталады. Алайда, бұл жұмыс ресурстары кезең-кезеңмен жүргізіліп жатыр,-дейді аудандық білім бөлімінің тәрбие жөніндегі әдіскері Інжу Ермекбаева. Сонымен қатар, бағдарлама аясында «Төрт тоқсанға – төрт өнер» жобасы бойынша бірінші оқу тоқсанында айтыс өнері насихатталып, жазба ақындар мен суырып салма ақындардың шеберліктері және негізгі айтыс өнерінің шығу тарихы мен қасиеті туралы сынып сағаттары мен мектепішілік шаралар да ұйымдастырылыпты. Екінші тоқсанда «Алтын сақа» жобасына сәйкес мектептер арнайы жоспар құрып, денешынықтыру пәні мұғалімдері өзіміздің ұлттық асық ойындарын насихаттауда. Сондай-ақ әр білім ошағында «Әкелер академиясы» жобасы жұмысын жалғастырып жатыр. Оқушылар арасындағы құқық бұзушылықтың алдын алу мақсатында «Туған жер – киелі құт мекен» жобасы іске асқан. Яғни, қыркүйек, қазан, қараша айларында ауданға қарасты киелі тарихи орындарға саяхат ұйымдастырылды. Әр сапар сайын 45 оқушыдан қамтылыпты. –Мұндағы басты мақсатымыз – жас ұрпақтың бойына туған жердің тарихын, ата-бабалардың қалдырған мол мұрасын үлгі-өнеге етіп түсіндіру, ұлттық құндылығымызды дәріптеу. Оларды сақтауға үйрету. Жалпы аталған бағдарламалар бойынша іс-шара одан әрі жалғасын таба бермек,-дейді Інжу Көшербайқызы.
П.ТҮРКЕНБАЙҚЫЗЫ
