№1 жалпы орта білім беретін мектеп кітапханасында «Менің дінге деген көзқарасым» тақырыбында «дөңгелек үстел» болып өтті. Оған Жылыой мұсылмандары орталық мешітінің наиб имамы, теолог Думан Балықшиев шақырылды.
Мектептің 9 сынып жетекшісі А.Досетова және кітапханашы Ф.Құрманованың ұйтқы болып, оқушылардың қатысуымен кітапхана залында өткен шарада дін мен оның төңірегіндегі түйткілді мәселелер айтылды.
Жасөспірім оқушылар алдында сөз алған теолог маман Думан Мұратұлы «Қоғамдағы бүгінгі күнгі ең басты мәселе – жас ұрпақты адамгершіліктің ең биік шыңы – имандылыққа, жат діни ағымдардың құрығына түсіп қалуына жол бермеу, оған қарсы тұрып, күрес жүргізу» дей келіп, ислам дінінің адам өміріндегі орны мен қазақ халқының дүниетанымындағы, тұрмыс – тіршілігіндегі, рухани құндылығының көркем мәтіндеріндегі ғұламалардың тәрбиелік өсиеттерін түсіндірді. Ислам дінінің негізі болып саналатын хадистер мен сүннеттердегі құндылықтарды салт – дәстүр, әдет – ғұрып тәрбиесімен сабақтастырып, оқушы бойына сіңіріп, тілін, ділі мен дінін сүюге, ата – ананы құрметтеуге, сабырлылыққа, төзімділікке, жат әдеттен сақтануға шақырды. Бұл ретте тәлім-тәрбиелік нақыл сөздерімен бөлісті.
Зеріп Нұрхасанова,
мектептің кітапхана меңгерушісі
