Қаладағы №1 жалпы орта білім беретін мектепте аудандық білім бөлімінің әдістемелік кабинетінің ұйымдастыруымен «Тарих сабағында оқушылардың танымдық-зерттеушілік белсенділіктерін арттыру жолдары» тақырыбында аудандық тарих пәні мұғалімдерінің семинары болып өтті.
Семинар қонақтарына жағымды ахуал қалыптастыру мақсатында шара мектеп психологі Дина Тимурқызының жүргізген психологиялық тренингімен басталды. Әрмен қарай тарих пәні мұғалімі Әлия Нұрышеваның 9 "Г" сыныбына өткізген "Қазақстан Республикасы тәуелсіздігінің жариялануы" тақырыбындағы ашық сабағымен жалғасты. Заманауи түрлі әдіс-тәсілдерді қолданып өткізген сабақ семинар қонақтарының жоғарғы бағасына ие болды. Мектептің тарихшы мұғалімдері Жазира Кулшурина мен Анаргүл Досетованың "Оқушыларды ҰБТ-ға дайындаудың тиімді әдіс-тәсілдері" атты шеберлік сынып сағаты да жақсы бағаланып, олар қолданылған әдістің тиімділігі аталып өтті.
Семинардың соңғы айдары тарих пәні мұғалімдері Самал Сарсенова, Альбина Тұрарбекова, Үміт Төреғалиеваның ұйымдастыруымен өткен "Жылыой - асылдар туған, шежіре тұнған құт мекен" атты шарасымен қорытындыланды. Онда оқушылардың өз еркімен ізденісін қалыптастыру, ойын еркін жеткізу мақсатында балалар "Мұнайшылар", "Мәдени қайраткерлер", "Батырлар" болып үш топқа бөлінді. Олар Жылыойға еңбегі сіңген қайраткерлерді, мұнайшыларды, сонымен қатар, Сүйінқара, Өтен, Төремұрат, Нарынбай батырларды зерттеп, қорғап шықты. Шараның соңы жерлес ақын-жазушымыз Өтеген Оралбайұлының Алматыдан жолдаған сәлемдемесімен аяқталды. Шараға 8 – 11 сынып оқушылары белсене қатысып, өз ойларын ашық, еркін жеткізе алды.
Соңынан үш топтың ішінен оқ бойы озық шыққан үздіктер анықталып, дипломмен марапатталды. Сөз алған аудандық білім бөлімінің әдіскер маманы Гаухар Әубекер семинардың жоғары деңгейде ұйымдастырылғанын айтып, №1 мектептің тарих пәнінің ұстаздарына арнайы сертификат табыстады.
Өз тілшіміз
