Иә, Кеңес әскерінің Ауған жерінен шығарылғанына да биыл 36 жыл толыпты. Қаншама боздақ қыршынынан қиылған зұлмат кездер қазір келмеске кетті. Бірақ ол күндер ұмытылмақ емес. Сондықтан бақытқа толы бейбіт күннің ашық аспаны астында «Ауған ардагерлеріне мың тағзым» тақырыбында өткен кездесу өскелең ұрпаққа патриоттық рух сыйлауды мақсат тұтты.
№4 мектептің қабырғасында ұйымдастырылған кездесуде оқушылар Ауған соғысының ардагерлері Серікбай Қожамұратов пен Алмат Молдабаевпен кездесті. Жат жердегі оқ пен оттың ортасынан оралған олар жастарға ағалық ақылын айтып, бастан кешкен оқиғаларымен бөлісті.
Шара барысында Серікбай Қуатбайұлы мен Алмат Асқарбайұлы оқушылардың қойған сауалдарына жауап беріп, сол бір бастан кешкен қиын кезеңді еріксіз еске түсіріп, естеліктерді тірілтті. Ал жоғары сынып оқушылары ардагер ағалары алдында өз өнерлерін көрсетті. Нақтырақ айтқанда, командаларға бөлініп, әскери жаттығулар арқылы сайысқа түсті.
Мұндай кездесудің өскелең ұрпаққа берері мол. Әрине, жалғасын табар болса, жастардың патриоттық сезімін, елін, жерін сүюге, Отанына деген махаббатын оятары сөзсіз.
Жұлдызай Сегізбай,
М.Әуезов атындағы № 4 орта мектептің 10 сынып оқушысы
