Еліміз үшін руханияттың алтын діңгегіне айналған ұлы ақын, кемеңгер ойшыл Абайдың туған күні жыл сайын еліміздің түкпір-түкпірінде ерекше аталып өтеді. «10 тамыз - Абай күні» ретінде ресми белгіленген бұл мереке - халқымыздың сөз өнеріне, ұлттық әдебиетке және рухани құндылықтарға деген құрметінің айқын көрінісі. Бүгінде ақынның туған күні қарсаңында түрлі мәдени іс-шаралар мен мерекелік концерттер ұйымдастырылды. Міне, осындай тағылымды шараның бірі Құлсары қаласындағы №2 қалалық кітапханада болып өтті.
Аталған мәдени мекеме – әрдайым жастардың ой-өрісін кеңейтіп, ел тарихына, әдебиетке деген қызығушылығын оятуға үлес қосып келе жатқан руханият ордасы. Бұл жолы да кітапхана ұжымы Абай шығармашылығына арналған мазмұнды кездесу ұйымдастырып, оқырманға терең әсер қалдырды. Жуырда №2 қалалық кітапхана мен «Мүмкіндігі шектеулі жандар» қоғамы бірлесіп, ұлы ақынның 180 жылдығына арналған «Артық ғылым - кітапта» атты әдеби кеш ұйымдастырды. Бұл тағылымды кеш ұлы ақынның рухани мұрасын кеңінен насихаттап, өскелең ұрпақтың ақын шығармашылығына деген қызығушылығын арттыруға арналды.
Кештің әсері мен шуағын сезініп, мазмұн-мәніне үңілу үшін біз №2 қалалық кітапхананың кітапханашысы Айгүл Нұржанқызымен байланысқанда:
- Бұл шараны өткізу арқылы халқымыздың дана ақыны, ғұлама ойшылы әрі сазгері Абай Құнанбайұлының поэзиясы мен әндерін көпшілікке кеңінен таныстыруды мақсат еттік. Жас буынды Абай мұрасын оқып-үйренуге, тереңірек танып-білуге ынталандыру арқылы ұлттық болмысымызды қалыптастыратынымыз айқын. Міне, сол мақсатта рухани шарамызды шынайы ынтамызбен ұйымдастырдық,-деді өз сөзінде.
Сондай-ақ, Айгүл Нұржанқызы әдеби кештің ашық аспанда өткендігі туралы баяндап:
- Әдеби кеш ашық аспан астында кітапхана оқырмандары мен ауыл тұрғындарының қатысуымен өтті. Абайдың өлеңдері мен әндері орындалып, қара сөздері де көрерменнің жүрегіне ой сала білді. Жалпы, Абай Құнанбайұлы «Тоғызқұмалақ» ойынын ерекше жақсы көргендіктен, «Қуат алып Абайдың оң ісінен» тақырыбымен ойын алаңын ұйымдастырдық. Топтан озған жүйріктерді естелік сыйлықтармен марапаттадық. Кеш өз жалғасын «Барлаушы» ауылындағы балалар ойын алаңында тапты. Бөбек Лауадинқызы мен Анар Арманқызы Абайға арнаған өлеңдерін оқыса, Әсет Дүйсембайұлы тұрғындарға «Ауылым» әнін арнады. Ал ақынның өлеңдерін Сайлау Райан, Раяна Ақылбекқызы, Рысгүл Орысбаева, Мансұр Ысқақов, Айымхан Әуесбаева және Кәусар Артықбай нақышына келтіріп, әсерлі түрде мәнерлеп оқыды. Кеш барысында Елеусінов Ермұхан күмбірлете күй тартса, Асқарқызы Лейла халық әнін шырқап, рухани кештің шырайын аша түсті. Шара жүргізушілері Абай өмірі мен шығармашылығына қатысты танымдық сұрақтар қойып, көрермендерді белсенді қатысуға тартты. Ауыл тұрғындары, әсіресе кішкентай бүлдіршіндер білімдері мен зеректігін танытып, сұрақ-жауап кезеңінде ерекше белсенділік көрсетті. Белсенді болған әр оқырманымызға кітапхана атынан түрлі кітаптар тарту еттік,-деді.
Сондай-ақ кітапханашы өз сөзінің соңында:
- Кітапхана күн сайын жаңалықпен қауышатын рухани орда. Мұнда үнемі жаңа басылымдар, газет-журналдар мен тың туындылар келіп тұрады. Ал кітап пен білімге құштар әрбір оқырманға біздің есігіміз әрдайым айқара ашық»-деп жүрек жылуын сездіріп, сөзін қорытындылады.
Оқырманға деген ықылас пен құрмет сезімі әр сөзінен байқалған кітапханашының бұл лебізі кешке жиналған қауымның жүрегіне жылы тигені айқын. Расында да, кітапхана – тек кітаптар мекені ғана емес, рухани байлықтың, ізденіс пен шабыттың қайнар көзі. Мұнда әр адам өзіне қажет білімді ғана емес, жан дүниесіне азық болар құндылықты табады. Ал Абай Құнанбайұлы – қазақ халқының рухани темірқазығы, ғұлама ой иесі. Оның әрбір сөзі ұрпаққа үлгі. Сондықтан жыл сайын тамыз айының алғашқы күндерінен бастап, еліміз бойынша түрлі танымдық және тәрбиелік бағыттағы шаралардың болуы - елдің бүгіні мен ертеңі үшін жасалған үлкен қадам. Мұндай рухани істер ел болашағы үшін сіңірілген өлшеусіз еңбек десек, артық айтқандық емес.
Әйгерім Ғалымжан
