Білім беру ұйымдарында «Дене шынықтыру пәні бойынша білім алушылардың физикалық жаттығуын және оқу жетістіктерін критериалды бағалауын енгізу» тақырыбы бойынша 2025 жылдың шілде айының 30-31 күндері Астана қаласында республикалық оқу семинары өткізілді.
Онда Ұлттық ғылыми практикалық орталығының мамандары және елімізге танымал дене тәрбиесі пәнінің білікті мамандары спикер ретінде жаңалықтар мен алдағы өзгерістермен нәтижелі заманауи үлгіде таныстырды.
Семинарға Атырау қаласынан және әр ауданнан бір-бір мұғалімнен қатысты. Жылыой өңірінен осы жолдар авторы – өзім барып, арнайы қатысып, алдағы оқу жылдарындағы өзгерістерді меңгеріп келдім. Атап айтсақ, 2025-2026 оқу жылында дене шынықтыру пәні бойынша критериалды бағалау пилоттық мектептерде өткізіліп, 2026-2027 оқу жылынан бастап Қазақстанның барлық мектептерінде жаңа бағдарлама бойынша бағалау жүзеге асатын болады.
Екінші енгізілгелі отырған өзгеріс ол - мектептердегі ерекше таңғы жаттығулар. Алдағы уақытта еліміздегі барлық мектептерінде 1-4, 5-9, 10-11 сыныптарда жас ерекшелігіне қарай таңғы жаттығулар өткізілетін болады. Оны жасы мен психологиялық ерекшеліктерін ескеріп, орта білім беру ұйымдарында оқушылардың дене жаттығуын музыка сүйемелдеуімен өткізу ұсынылып, әндердің тізбегі де әзірленген.
Екі күндік семинардан кейін 1 тамыз күні «Білім келешегі: Адал азамат - Кәсіби маман» педагогтардың республикалық тамыз саммиті және «Дене шынықтыру: денсаулық, құндылықтар, кәсібилік» тақырыптарында республикалық дене шынықтыру педагогтары секциясы өтті. Саммитте Қазақстанның барлық облыстарынан білікті мамандар бас қосып, дене шынықтыру пәнінің болашағы мен маңыздылығы жөнінде ой бөлісті. Өзекті мәселелер ортаға салынып, талқыланып, жоғары деңгейде өтті. Бұл республикалық саммит пен семинардан көп сабақ алып қайттым. Болашақта осы үйренген әдіс-тәсілдерді ауданның дене тәрбиесі пәнінің мұғалімдеріне жеткізіп, әріптестеріммен бірге нәтижелі жұмыс жасаймын деген ойдамын.
Жәнібек Атырауов,
№8 жалпы орта білім беретін мектептің дене тәрбиесі пәні мұғалімі,
Құлсары қаласы
