Өткен қаңтар айында қаладағы №19 жалпы орта білім беретін мектеп базасында «Үздіксіз жетілген тәжірибе - сапалы білімнің негізі» атты онкүндік болып өтті. Мектеп оқушыларының білім алудағы жетістігін мониторингілеу, білім сапасын көтеру және бастауыш сынып мұғалімдеріне әдістемелік көмек көрсетуді мақсат тұтқан онкүндікті аудандық білім бөлімінің әдістемелік кабинеті ұйымдастырды.
Бұл, шынымен де, өңірдегі бастауыш сыныптардың білім беру дәрежесін көтеретін мәнді іс-шара болды. Онда аудандағы білім ордаларында еселі еңбек етіп келе жатқан тәлімгер ұстаздар жас мамандарға білгенін үйретіп, көпжылдық тәжірибесімен бөлісіп, ақыл-кеңесін аямады. Ұлағатты ұстаздыққа бет алған жас мұғалімдер болса, алдыңғы толқын аға буыннан болашақ еңбек жолында кәдеге жарарлық мол мағлұмат алды.
Ақыры, онкүндіктің жабылу салтанаты да келіп жетті. Онда онкүндік аясында өткізілген семинарларда шеберлігімен көзге түсіп, спикер болған бастауыш сынып мұғалімдері марапатталды. Аудандық білім бөлімінің бас маманы Гүлжансара Таңатарова белсене қатысқан бастауыш сынып мұғалімдеріне арнайы диплом мен алғыс хат табыстады.
«Атырау облысы білім және ғылым қызметкерлері кәсіподағы» қоғамдық бірлестігінің аудандық комитеті филиалының төрайымы Гүлайым Төребекова «Шебер мұғалімге шекара жоқ» атты аудандық десант сабақ байқауынан жүлделі орын алған мұғалімдерді арнайы сыйлықпен және алғысхатпен мадақтады.
Өз тілшімізден
