Кемел Тоқаев – туған халқының мақсат-мұраты мен ертеңгі нұрлы болашағы үшін адал еңбек етті. Ел мүддесін майданда қарумен, бейбіт күнде қаламмен қорғады. Өзінің 63 жылдық ғұмырында адамгершілік атты ұлы құндылыққа дақ түсірмей, өз Отанының шын патриоты бола білді. Ел қорғау жолында шыбын жанын шүберекке түйген ержүрек майдангер еді. Ол – қазақ детективінің дарабозы.
Қаладағы №1жалпы орта білім беретін мектеп кітапханасында Ұлы Отан соғысының ардагері, журналист-жазушы, қазақ әдебиетіне шытырман оқиғалы детектив жанрын алып келген қарымды қаламгер Кемел Тоқаевтың 100 жылдығына орай “Өнегелі өмір” атты 11 «а» сынып оқушыларымен өткен танымдық шарада қаламгердің, міне, осы қырлары сөз болды. Оны сынып жетекшісі Ш.Кулекенова ұйымдастырды.
Шара Кемел Тоқаевтың шығармаларын оқырмандарға насихаттай отырып, ел ертеңін отансүйгіштікке, батылдыққа баулу, білімді болуға, кітап оқуға деген қызығушылығын арттыру, кітапханаға оқырмандарды тарту мақсатын көздеді.
Иә, ол - кеңес кезінде кітаптары ең көп оқылып, әдебиетте аты алтын әріптермен жазылған қаламы қарымды жазушы, ақтаңгер журналист. Детективтік салада жазушының «Тасқын», «Көмескі із» «Түнде атылған оқ», «Таңбалы алтын», «Соңғы соққы», «Ұясынан безген құс» сынды көптеген шығармалары жарық көрді.
- К.Тоқаевтың көпшілік байқай қоймайтын, өз заманында мән бермеген қырлары ашылып, бейне бір жаңа, тың туындымен сырласып отырғандай күй кешудеміз,-деді мектеп директорының тәрбие ісі жөніндегі орынбасары А.Оспанова. - Ол – ұлтына қорған болар Президентті тәрбиелеген парасатты тұлға. Өнегелі өмір жолы, еңбекқорлығы мен адами қасиеттері жас ұрпаққа үлгі болуға лайық.
«Ұлттың ұлы тұлғасы» атты бейне-жазба арқылы К.Тоқаевтың еңбек жолдарына қысқаша шолу жасаған сынып жетекшісі Ш.Кулекенова:
-Аштық кезінде бұл отбасы Фрунзеге (қазіргі Бішкекке ) көшіп келіп, сол жерде ата-анасынан, қарындасынан айырылыпты. Қасым деген ағасымен екеуі балалар үйінде тәрбиеленген.Ағасын аузынан тастамайтын «Өзіме қамқор болған ағаның майданда қаза болуы мені шын жетім етті. Оны ұмыта алатын емеспін. Жаңа туған тұңғыш ұлының Жомарт деген атына Қасым ағамның атын қосып, өз есімімді атап жүрмін» деген екен. Бұл сөзді Қасымжомарт Кемелұлы «Әке туралы толғаныс» кітабында жазған,- деп түсіндірді жас оқырмандарға.
Шара соңында К.Тоқаевтың кемеңгерлігі, көркем мінезі ұрпақтан - ұрпаққа өнеге, жастарға үлгі екенін жеткізген ол артына қалдырған мол мұраларын сақтай білуге, әр шығармасын тұшына оқуға шақырды.
З.НҰРХАСАНОВА
кітапхана меңгеру
