«Кең Жылыой» мәдениет үйінде биыл мектеп бітіретін түлектер үшін «Мамандық мақсатқа жетелейді» тақырыбында облыстық ашық есік күні өтті. Бұл шараға 25-тен астам университеттің өкілдері, мектеп бітіруші түлектер мен олардың ата-аналары қатысты.
Форумды облыстық Білім беру басқармасы басшысының міндетін атқарушы Айнагүл Дүйсекенова ашты. Ол өз сөзінде:
«Бүгінгі күні Жылыой ауданына келудегі мақсатымыз - Президент Қасым-Жомарт Тоқаевтың халыққа Жолдауындағы тапсырмасын жүзеге асыру. Жолдауда болашақ жастарымыздың білім жағдайын жақсартуға байланысты бірқатар тапсырмалар берілген еді. Биылғы оқу жылында мектеп бітіруші түлектер үшін мемлекет тарапынан ерекше қамқорлық жасалуда. Атырау облысына мемлекеттік гранттан бөлек, 4000 грант бөлу туралы тапсырма берілген болатын. Бүгін ауданға осы грант бөлінген университеттердің өкілдері келіп отыр. Биыл Жылыой ауданында 117 оқушы мектепті бітірмекші. Оның 30-ы Алтын белгіге, ал 9-ы үздік аттестатқа үміткерлер қатарында. 3000 грант техникалық, 800-і педагогикалық мамандықтарға бөлінген. Оқушы өзінің білім деңгейін ҰБТ-да көрсетуі қажет. Мониторинг бойынша Жылыой ауданындағы түлектердің басым көпшілігі физика, математика пәнін таңдап отыр», - деді.
Келесі сөз кезегін аудан әкімінің орынбасары Әнуар Шәкіров алды. Әнуар Играшинұлы өз сөзін мектеп бітіруші жастарға қарата айтты.
«Жылыой ауданы – мұнайлы аудан. Ахмет Байтұрсынов айтқандай, адамға тіл, құлақ қандай керек болса, білім де сондай керек. Сондықтан да сіздердің, яғни, Қазақстанның жас буынының қадамы нық болсын деп, облысымызға 4000 грант бөлінді. Мемлекеттік деңгейде осындай үлкен қолдау жасалып отырса, сіздер де ҰБТ-ны жақсы деңгейде тапсырады деп сенім артамын. Түлектер бүгінгі форумнан өздеріне керекті ақпараттарды алады деп сенемін»,- деді аудан әкімі орынбасары.
Әл-Фараби атындағы Қазақ ұлттық университетінің оқуға қабылдау кеңсесінің жетекші маманы Мадияр Қаділбеков елімізге белгілі үздік білім ордасы туралы мектеп бітіруші жастарға жан-жақты мәліметтер берді.
Одан соң Алматы қаласындағы логистика және көлік академиясының жауапты хатшысы Жұмажан Серікқалиев академия туралы толығырақ таныстырды және бейнеролик ұсынды.
Форумнан кейін түлектер мен ата-аналарға арналған №6 жалпы орта білім беретін мектепте грант бөлінген жоғары оқу орындарының көрме-жәрмеңкесі өтті. Ол жерде түлектер сан түрлі сұрақтарына жауап алды.
Ж.ЕСМҰХАНҚЫЗЫ
