Тәрбие – ұрпақты биік мұратқа жетелейтін сапалы білімнің тұғыры. Ұлттық құндылықтармен сусындап өскен ұрпақ қана ұлағатты болмақ. Дәл осындай бағытта тәлім-тәрбиені алған ел ертеңі ұлттың сапасын құрайды. Сондықтан да қадір-қасиет, ар-намыс, адалдық, патриотизм, жауапкершілік, әдептілік, мейірімділік, сүйіспеншілік, үлкенге ізет, кішіге құрмет сияқты қасиеттерге ие шығармашыл азаматты тәрбиелеу маңызды. Қазір еліміздегі барлық мектепке дейінгі ұйымдарда адами құндылықтарға негізделген «Біртұтас тәрбие бағдарламасы» іске асып жатыр. Осы бағдарлама аясында «Қызғалдақ» балабақшасының «Бауырсақ» кіші тобында түрлі іс-шаралар өтуде.
Топ тәрбиешісі Гүлнар Қоқанова "Атам мен әжем ауылына барғанда", "Текеметті ою-өрнектермен әшекейлейміз", "Ұлттық аспабымыз домбыра және қобызбен танысайық" атты қызықты сабақтар ұйымдастырып, кішкентай тәрбиеленушілерді ұлттық мәдениетімізбен таныстырды. – Бұл сабақтар балалардың бойына ұлттық тәрбиені сіңіріп қана қоймай, олардың моторикасын дамытып, сөздік қорының молая түсуіне ықпалын тигізбек,-дейді Гүлнар Нәсіпқалиқызы.
«Бауырсақ» тобының тәрбиеленушілері сондай-ақ ұлттық бұйымдар түрі – торсық, бесік, текемет, сырмақтармен танысса, тағы бір қызықты сабақ «Жайлаудағы киіз үйге саяхат» жасауға арналды. Сол күні балалар ұлттық нақышта киінеді. Қыздар әдемі кәжекеймен, ұлдар оюлы тақиямен шараның сәнін келтіре түсті. Апайлары Г.Қоқанованың өзі кимешек пен қос етек көйлек, қамзол киіп, өзі дайындаған киіз үйдегі бұйымдармен кішкентай тәрбиеленушілерді таныстырып шықты. Бір қызығы, 37 жыл тәжірибесі бар педагог-сарапшы Гүлнар Нәсіпқалиқызы таңертең балабақшаға келетін әр баланы қабылдап болғанша қазақтың күйлерін қосып қояды екен. Осылайша, тілі енді ғана шығып келе жатқан кішкентай тәрбиеленушілеріне бір сәт халық әндері мен күйлерін тыңдатып, балалардың қазақы дүниелерді көзбен көріп, қолмен ұстауларына мүмкіндік жасайды. Жалпы адамзаттық және ұлттық құндылықтарды бойына сіңірген, әлемдік озық білімді игерген саналы азаматты тәрбиелеуге осындай игі, әрі жүрекке жылы қабылдайтын шаралардың септігі мол.
Д.ЕЛЕУСІН
