Жұртшылық арасында кітап оқуды кеңінен насихаттау, рухани, интеллектуалдық даму жолында жастарды ынталандыру және мәдени құндылықтарымызды халыққа жеткізу – «Kitap time» жобасының негізгі мақсаты болды. Осыған орай аудандық кітапханада өткен III республикалық фестивальге рухани орда қызметкерлері, №2 дарынды балаларға арналған қазақ-түрік лицейінің оқушылары, қалың оқырман қауым қатысты.
Ашылу салтанатында кітапхана директоры Балзия Кенжебекова барша оқырмандарды кітап мерекесімен құттықтады. Фестивальдің алғашқы кезеңінде келушілер «Жылыой әдебиет әлемі» атты кітап көрмесін тамашалады. Анықтамалық–библиографиялық бөлім меңгерушісі Ж.Байгуршимова кітап көрмесі арқылы өлкеміздің тарихымен, экономикасымен, сонымен бірге жергілікті қаламгерлердің өмір жолы мен шығармашылығына шолу жасады. Фестивальдің II кезеңінде «Мен оқыған кітап» әдеби сандық ойыны өтті. «Абай әлемі» тақырыбында сұрақтар қойылып, қатысушылар жауап берді.
«Суреттер сөйлейді» кезеңінде қатысушылар экранда көрсетілген суреттерден повестер мен шығармалардың атауын тапты. Оқырман Амангелді Мекебаев өзі оқыған кітабы Джек Лондонның «Мартин Иден» шығармасын оқушыларға ұсынды. Мазмұнын да баяндап берді. Оқушылар М.Әуезовтың «Көксерек» кітабын оқуды ұсынып, шығармадан алған әсерін талқылады.
«Тіл мерейі – ел мерейі» атты брейн-рингты оқырман қамту бөлімінің меңгерушісі Айгүл Жұмырбаева жүргізді. Мұнда 5 кезең бойынша «Дарын» мен «Болашақ» командалары бақ сынады.
Қос команда оқушылары барлық кезеңдерге белсене қатысты. Нәтижесінде «Дарын» тобы I орынмен, «Болашақ» тобы алғысхатпен және Жастар ресурстық орталығының сыйлығымен марапатталды. Әрмен қарайғы ойындар барысында С.Өтебаев атындағы мұнай-газ технологиялық колледжі мен Т.Байсырымов атындағы Құлсары гуманитарлық-техникалық колледжі студенттері, аудандық Жастар ресурстық орталығының еріктілері және №2 «Білім–Инновация» лицей интернатының оқушыларынан құрылған топтар сайысып, «Сұрақ – бізден, жауап – сізден», «Кім білгір?», «Ұшқыр ой» кезеңі бойынша өз білімдерін сынға салды.
Фестиваль күні ауданымыздың барлық кітапхана бөлімшелерінде осындай іс-шаралар өз жалғасын тапты. Атап айтқанда, балалар кітапханасында «Балалар әдебиеті – ең ұлы әдебиет», №1,2,3 қалалық кітапханаларда «Балалық көңілдің пернесін дөп басқан» Б.Соқпақбаевтың 100 жылдығына орай портретті кеш, «Өзің оқы, өзгеге ұсын» атты буккроссинг, «Кітап – рухани қазына» шарасы, №4 Жаңа Қаратон, Қосшағыл, Тұрғызба, Шоқпартоғай сынды өзге де ауылдық кітапханаларда «Әдебиет әлеміне саяхат» интеллектуалды ойыны, Ә.Кекілбаевтың мерейтойына орай «Кемел тұлға кемеңгері», «Әбіш әлемі» кеші, «Мәдени мұра – ұлт құндылығы» кітап көрмесі, «Мәңгілік елге – кітаппен бірге», «Мұқағали – поэзия әлемі» кештері ұйымдастырылды.
Ж.ШАҢҚАНОВА
