Жақында «Өнеріміз саған – Қазақстан» атты балабақша тәрбиеленушілері арасында жыл сайын өтіп тұратын республикалық байқаудың аудандық және облыстық кезеңдері өз мәресіне жетті. Оған ауданның бүлдіршіндері қатысып, қанжығасын майлап қайтты. Үздіктер қатарында «Үздік шебер» номинациясы бойынша облыстағы үздік үштіктің қатарына іліккен «Ақбөбек» балабақшасынан Раяна Рыспаева да бар.
Республика көлемінде өткен бұл сайысқа барлық балабақша белсене қатысты. Кішкентай болса да бүлдіршіндердің жеңіске деген жігері көпті сүйсінтті. Соның ішінде «Ақбөбек»-тің «Қызғалдақ» тобының тәрбиеленушісі Раяна Рыспаеваның өнерге деген құлшынысы ерекше болды. Әсіресе, қолөнерге келгенде ынтасы зор. Қабілетін әуел бастан аңғарған тәрбиешісі Мира Сеңгірбаева оны арнайы дайындады. Байқау барысында Раянамен бірге текемет басып, өнерімен қазыларды тәнті етті. Аудандық сайыстан сүрінбей өткен бүлдіршін облыстық байқауда да қапы қалған жоқ. Облыс бойынша оқ бойы озып, ІІІ орынды иеленген Раянаның мерейі үстем болды.
-Жасынан өнерге құштар бүлдіршіннің болашағы да жарқын. Алдағы уақытта Раянадай талай бүлдіршініміз өнерде әлі талай топ жарарына сенеміз. «Ел ертеңі – салауатты жастар» демекші, біз де өз кезегімізде әрбір бөбекті жастайынан жақсы жолға бағыттап, білім, өнер, спорт сынды салаларда жетілдіру үшін бар күшімізді саламыз, дейді Мира Амандыққызы.
Е.Ахметкәрімов
