Биылғы ақпан айында ауданда 13 пен 24 жас аралығындағы жастардың бәсекеге қабілеттілігін арттыруға бағытталған бірегей JasUP жобасы басталды. Бұл кең ауқымды білім беру жобасы - «Теңізшевройл» компаниясының Әлеуметтік инвестициялар бағдарламасының бір бөлігі. Ол жастардың техникалық дағдысын дамытуға, заманауи технология әлеміне енуіне, еңбек нарығында бәсекеге қабілетті болуына мүмкіндік беруге бағытталған.
Жоба аясында жастарға арналған оқыту курстары мен шеберлік сабақтарынан бастап робототехника, бағдарламалау, 3D модельдеу және жасанды интеллект бойынша жарыстар мен фестивальдерге дейінгі іс-шаралардың кең ауқымы ұсынылады. Аудан жастары лазерлік кесу және гравировка сияқты заманауи технологиялармен жұмыс істеуге, сондай-ақ Arduino микроконтроллерін негізге алған робототехника және деректерді өңдеу мен жасанды интеллектіні әзірлеуде қолданылатын Python бағдарламалау тілін меңгеруге ерекше мүмкіндік алды.
Биылғы жылдың бірінші жартысында аудандағы көктемгі су тасқыны жобаның жұмысын уақытша тоқтатты. Дегенмен, ол өз қызметін жалғастырып, қысқа мерзімде тоғыз оқыту курсы мен алты шеберлік сабағын өткізуге мүмкіндік алды. Тамыз айында мұғалімдерге арналған курстар белсенді түрде жалғасып жатыр. Онда ұстаздар жабдықтарға техникалық қызмет көрсету, бағдарламалау және 3D модельдеуді үйреніп, алған білімдерін оқушыларына жеткізетін болады. Ең маңыздысы - жоба тек жастарды ғана емес, жасөспірімдерді де қамтыды. 8-ден 12 жасқа дейінгі қатысушылар робототехника мен бағдарламалау курстарына қатысу мүмкіндігіне ие болды. Бұл JasUP жобасы технологиялар саласында дамып, өсуге ниетті барлық адамдарға қолжетімді екенін дәлелдейді.
Бүгінде жоба ауданның 280 оқушысы мен мұғалімін қамтыды. Бұл процесс жастардың техникалық сауаттылығын арттырып қана қоймай, жобаның ұзақ мерзімді тұрақтылығын қамтамасыз етеді. Әрбір мұғалім, өз кезегінде, жаңа буын оқушыларын заманауи технологиямен таныстырып, олардың білімі мен қызығушылығын ұштайды. Осылайша, JasUP жобасының нәтижесі тек қазіргі қатысушылармен шектеліп қалмай болашақ ұрпақтың да қызығушылығын оятып, оның ұзақ мерзімді тұрақтылығын қалыптастырады. Бұл - қатысушылар алған білімін әрі қарай пайдаға асырады деген сөз.
Жалпы JasUP жобасы тек жастардың техникалық дағдысын дамытуға ғана емес, олардың болашаққа деген сенімін арттыруға, табысты мансапқа жетелейді. Жастардың білімі мен технологиялық дамуына салынған инвестиция өз жемісін беріп, өзін-өзі дамытуы мен қазіргі әлемде табысқа жетуі үшін зор перспектива сыйлайды.
Алдан АСҚАР,
Қазақстандық білім беру және спорттық робототехника "КазРоботикс" Федерациясы"
Республикалық қоғамдық бірлестігінің Атырау облыстық филиалының директоры
