Жақында Қазақстан Республикасының Президенті Қасым-Жомарт Тоқаев «Білім келешегі: адал азамат, кәсіби маман» тақырыбындағы республикалық тамыз конференциясының пленарлық отырысына қатысты. Онда Мемлекет басшысы: «Жаңа дәуірде мектептің жағдайы мемлекеттің дамуына тікелей ықпал етеді. Ал мектептің қандай болмағы ұстазға байланысты. Бүгінде педагогика саласы ғылымның ең маңызды тармағының біріне айналды. Сондықтан бұл салаға түбегейлі жаңа көзқарас қажет. Заманауи технологияның көмегімен білім беру жүйесін жедел әрі тиімді жаңғыртуға болады. Біз білім саласын ең үздік халықаралық стандарттарға сай дамытуымыз керек»,-деген еді.
Ұрпақ тәрбиесі - балабақшадан
Әрине, Мемлекет басшысының көтерген мәселелері аудан көлемінде де жүзеге асырылып жатыр және алға қарай да басты назарда болады. Осы ретте атап өтер болсақ, қазіргі таңда аудан көлемінде 20 жалпы орта білім беретін мектеп, 24 балабақша (оның үшеуі – жекеменшік), төрт мектептен тыс мекеме және №2 педагогикалық-психологиялық түзету кабинеті жұмыс жасайды. Мектептен тыс 4 қосымша білім беру ұйымы жұмыс жасайды. Онда 4047 оқушы білім алады. Қосымша біліммен қамтуды көбейту мақсатында «Үміт» жеке меншік орталығы ашылып, 140 балаға білім беріп отыр. Бұл орайда атқарылып жатқан жұмыстар мен алдағы жоспарлы іс-шаралар кешенін ұрпақ тәрбиесінің іргетасы саналатын мектепке дейінгі мекемелер бойынша атқарылып жатқан жұмыстардан бастап сараласақ.
Қазақстан Республикасы Үкіметінің 2023 жылғы 28 наурыздағы №249 қаулысымен бекітілген «Баршаға қолжетімді сапалы білім» баяндамасындағы басты міндеттің бірі – барлық бала үшін сапалы мектепке дейінгі тәрбие мен білім алуға теңдей қолжетімділікті қамтамасыз ету. Осыған орай, балаларды 2 жасынан бастап мектепке дейінгі біліммен қамтуға қатысты шаралар қабылданып жатыр. Бұл ретте ата-ананың формат таңдау құқығы бар: үйде, шағын орталықтарда немесе балабақшаларда тәрбиелеп оқытуына болады.
Күні бүгін аудан бойынша балабақшада 4878 бала, мектепалды сыныптарда 1329 бала, мектеп жанындағы шағын орталықтарда 249 бала тәрбиелену үстінде. Дегенмен де балабақша кезегінде тұрған балалар да бар. Ол 2156 бүлдіршінді құрайды. Яғни, қамту пайызы - 89,6 % .
Әрине, Мемлекет басшысы Қасым-Жомарт Кемелұлы Тоқаев біздің алдымызға балабақшалардағы кезекті азайту міндетін қойды. Осы мәселені шешу мақсатында «Жылыой ауданын дамытудың 2023-2027 жылдарға арналған іс-шаралар жоспарына» 7 балабақша құрылысын салу енгізілген. Сонымен қатар апатты деп танылған Шоқпартоғай ауылдық округіндегі 160 орындық «Балдәурен» балабақшасының орнына «ТеңізШевройл» ЖШС-нің демеушілігімен 280 орындық жаңа мектепке дейінгі мекеме құрылысы жүріп жатыр. Ол биылғы жылдың маусым айында басталып, 2026 жылы аяқталады деп жоспарланып отыр. Ал «Мұрагер» ықшам ауданындағы «Салтанат» бөбекжай бақшасының ғимаратына жасалған техникалық зерделеудің қорытындысымен онда күрделі жөндеу жұмыстары жүргізілетін болды. Жоба-сметалық құжаттамасы жасақталғаннан кейін қаражат бөлініп, қалпына келтіріліп, іске қосылады.
Екіншіден, біз бұл мәселенің шешімін жеке бизнес белсенділігін арттыру арқылы да шешіп жатырмыз. Осы салада ауданда 2024 жылы бір, 2025 жылы екі жаңа жекеменшік балабақша іске қосылып, барлығы бес балабақша жұмыс жасайды.
166 түлек – мемлекеттік грант иегері
Қазақстан Республикасы Үкіметінің 2021 жылғы 12 қазандағы №726 «Білімді ұлт» сапалы білім беру» ұлттық жобасын бекіту туралы» қаулысы білім сапасын арттыру жөніндегі жұмыстың негізгі бағыттарын айқындайды. Яғни, білім беру процесіне қатысушылардың үздік білім беру ресурстары мен технологияларына бірдей қолжетімділікті қамтамасыз ету, жылдам өзгермелі әлемде табысты оқушылардың білім алуға деген сұранысын қанағаттандыруды көздейді. Ауданда 2024-2025 оқу жылында бес білім беру ұйымы - «Жаңа мектеп», бір оқу орны - «Тірек мектебі», үш білім ордасы - «Нысаналы мектеп» жобасына енді.
2024 - 2025 оқу жылында 18 463 оқушы білім алып, тәрбиеленді. Мектептердегі сапа көрсеткіші 57,1% болып, өткен оқу жылымен салыстырғанда +1,0% артып отыр, үлгерім - 100 %. Биыл 11 сынып бойынша 2 түлек «Алтын белгіге», 42 түлек «Үздік аттестатқа» және 78 оқушы 9 сыныпты «Үздік аттестатқа» аяқтады. Ұлттық бірыңғай тестілеуге 794 түлек қатысып, орта балл 55,2 болды. Былтырғы оқу жылымен салыстырғанда 1 орта балға артып отыр. 36 түлек 100 -ден жоғары ұпайды жинады. Өткен жылы бұл көрсеткіш 31 оқушы болған еді. Яғни, 5 түлекке артты. Нәтижесінде 166 түлек мемлекеттік білім беру грантын иеленді. №22 орта мектептің оқушысы Кипр мемлекетінің Халықаралық Файнал университетінің стоматология факультетінің грантына ие болса, Губкин атындағы Ресей мемлекеттік мұнай және газ университетінің Атырау қаласындағы филиалына 3 түлек грантпен оқуға түсті.
Биылғы жаңа 2025-2026 оқу жылын аудан бойынша 1-11 сынып аралығында 18 816 оқушымен бастағалы отырмыз. Сонымен қатар шағын орталықта 200 бала, мектепалды сыныбында 1265 оқушы болады. Мектеп табалдырығын алғаш рет аттағалы отырған 1 сыныпқа 1763 оқушы қабылданады.
Өткен оқу жылында оқушылардың білім жетістіктерінің мониторингі (ББЖМ) жүргізілді. Ол – бұл оқу жетістіктерінің МЖМБС талаптарына сәйкестігін бағалау мақсатында білім беру ұйымдарынан тәуелсіз түрде өткізілетін сыртқы мониторинг. Мақсаты – бастауыш және негізгі орта білім деңгейінде білім беру сапасын арттыру бағытында шешімдер қабылдау үшін объективті деректер алу. Осы мақсатта аудан бойынша 2025 жылғы сәуір айында 9 орта мектеп (№2, №3, №8, №15 С.Карабалин, №16 Д.Жазықбаев атындағы, №17, №21, №22, №23) білім алушылардың білім жетістіктерінің мониторингіне қатысты.
Технологиялар қарқынды дамып, білім беруге қойылатын талаптар жаһандық деңгейде өзгеріп жатқан қазіргі жағдайда функционалдық сауаттылықты бағалау мазмұны мен құрылымы үнемі жаңартылып тұрады. Осыған байланысты «PISA-2025» зерттеуінің шеңберін мұқият зерделеу ерекше маңызға ие болды. Бұл зерттеуде басым бағыт ретінде жаратылыстану-ғылыми сауаттылық белгіленген, сонымен қатар шет тілдерін меңгеру, сандық құралдар мен тәжірибелерді қолдана отырып мәселені шешу дағдысын бағалауға қосымша көңіл бөлінеді. Жасанды интеллект пен цифрлық технологиялар кеңінен енгізіліп жатқан кезеңде оқушыларда бейімделгіштік, сыни ойлау, ақпаратты талдау және жедел өзгеретін ортаға негізделген шешім қабылдау қабілетін қалыптастыру ерекше маңызды. Ауданда 2024-2025 оқу жылында «Мектептерге арналған PISA-2024» зерттеуі бойынша облыстық білім беру басқармасының 2024 жылғы 22 қарашадағы бұйрығы шықты. Соның негізінде өткен жылдың қараша айының 22-сі күні «Мектептерге арналған PISA-2024» халықаралық зерттеудің негізгі кезеңінен №4 орта мектептен- 50, №15 орта мектептен- 25, №17 орта мектептен 10 оқушы өтті. Барлығы 15 жастағы 85 оқушы қатысты. «PISA-2025» халықаралық зерттеуі бойынша ҚР Оқу-ағарту министрлігінің 2025 жылғы 18 наурыздағы №41 бұйрығы негізінде 2025 жылдың 21 сәуір күні «PISA-2025» халықаралық зерттеудің негізгі кезеңінен №5 орта мектептен - 34 оқушы, №6 орта мектептен 42 оқушы өтті. Барлығы 15 жастағы 76 оқушы қатысты. Аталған зерделеудің нәтижесі алдағы уақытта шығады.
Пәндік олимпиада, шығармашылық байқау: жеңістер мен жетістіктер
Ауданда өткізілген 2-11 сыныптар аралығындағы олимпиадаға қатысқан оқушылардың жүлделі орын иеленгені білім бөлімінің дипломымен және заттай сыйлығымен марапатталып, облыстық, республикалық кезеңдерге қатысып, жетістіктерге жетті.
Айталық, 9-11 сынып бойынша жалпы білім беретін пәндердің облыстық кезеңінен жүлделі ІІ орын иеленген №18, №6 орта мектеп оқушылары «Зерделі ақыл – ой орталығының» 40 пайыздық сертификатын жеңіп алса, ІІІ орын алған №3, №2, №16, №18, №22 орта мектеп оқушылары «Зерделі ақыл – ой орталығының» 30 пайыздық сертификатын иеленді. 5-6 сынып аралығында өткен республикалық олимпиадаға №4 М.Әуезов орта мектебі қазақ тілі мен әдебиеті пәнінен қатысып, жүлделі ІІ орын алса, №16 Д.Жазықбаев атындағы орта мектеп математика пәнінен қатысып келді. 2-4 сынып бойынша облыстық олимпиадаға 11 оқушы қатысып, І орынды - 3 оқушы; ІІ орынды – 3 оқушы; ІІІ орынды 3 оқушы жеңіп алып, екі оқушы Алғыс хат иеленді. Ал Алматы қаласындағы бастауыш 2-4 сынып аралығында өткізілген республикалық «Бастау» олимпиадасына №6 орта мектептен 2 оқушы қатысып, жүлделі ІІ орынды иеленді. Астана қаласында өткен «Ауыл мектебі» жалпы білім беретін пәндердің республикалық олимпиадасына үш оқушы қатысып, №22 орта мектеп биология пәнінен І орын, информатика пәнінен ІІ орынды иеленсе, №4 орта мектеп қазақ тілі мен әдебиеті пәні бойынша жүлделі І орынды жеңіп алса, осы оқушы SDU университетінің грант иегері атанды,. Маусым айында өткізілген марапаттауда екі оқушы облыс әкімінің Алғыс хаты және 100 мың теңге сертификатына ие болды. Республикалық «Алтын сақа» олимпиадасына қатысқан №8, №21, №10, №6, №19, №2, №3 мектеп оқушылары жүлделі І, ІІ, ІІІ орынға ие болды. №2 орта мектептің 3 сынып оқушысы жүлделі І орынды жеңіп алып, «Зерделі ақыл-ой орталығының» дипломымен және ақшалай 20 мың теңгемен марапатталды. «Алтын асық» олимпиадасына қатысып, жақсы нәтиже көрсеткен №1, №21, №6, №2, №8 орта мектептердің 3-4-5 сынып оқушылары «Зерделі ақыл –ой орталығының» заттай сыйлығына ие болды.
Алматы қаласындағы «Медеу» тау спорт кешенінде өткен республикалық «IQANAT» олимпиадаcының марапаттау рәсімінде №22 орта мектептің бір оқушысы Бурабай қаласындағы «IQANAT» мектеп пансионатында грантпен оқуға қабылданса, осы мектептің тағы бір оқушысы «IQ ADVANCE» бағдарламасына ілігіп, «IQANAT» мектебінің интенсивті оқу сессияларына қатысады. Ақмола облысының Щучинск қаласы, Бурабай шипажайында орналасқан «Балдәурен» республикалық оқу-сауықтыру орталығына ХХ республикалық «Зерде» зерттеу жобалары конкурсына жаратылыстану - математикалық бағыты бойынша №7, №3, №6 орта мектептен үш оқушы қатысып, жүлделі орындарға ие болды.
Облыстық «Меңдекеш Сатыбалдиев оқуларына» қатысқан №18, №10, №17, №16 мектеп оқушылары ІІ, ІІІ орын, Ақтау қаласында өткен «Әбіш оқулары» республикалық ғылыми-шығармашылық конкурсында №2 орта мектептің 10 сынып оқушысы жүлделі ІІ орын, Петропавл қаласында өткен «Мағжан оқулары» республикалық ғылыми-шығармашылық байқауында №21 орта мектептің 10 сынып оқушысы І орын, Астана қаласында өткен республикалық «Жұлдызай» ұлттық инклюзивті ойындарына қатысқан №3 орта мектептің оқушылары «Бес асықтан» жүлделі ІІІ орынды иеленді. Облыстық «Ұлы өнертапқыштыққа алғашқы қадам» байқауында №19, №21 орта мектеп оқушылары І, ІІ орын алды. Облыстық мектепке дейінгі білім беру ұйымдарының тәрбиеленушілері арасында «BABYSKILLS ATYRAU» чемпионатына қатысқан «Қызғалдақ», «Айгөлек», «Айналайын», «Құлыншақ», «Балауса» балабақшалары жүлделі ІІ, ІІІ орынға ие болды.
«ҚР Білім беру ісінің үздігі», домбырашы ұстаз, дирижер Боздақ Рзахановтың 90 жылдығына арналған сайыста Т.Құлтумиев атындағы №1 Құлсары балалар саз мектебінің жас домбырашылары жүлделі І, ІІ орын, облыстық «Қола домбыра» оқушылар айтысынан №13 мектеп оқушысы жүлделі ІІ орынды жеңіп алды. Ал облыстық жеңіл атлетикаға қатысқан №2, 15, 6, 3, 2, 9, 4 орта мектеп оқушылары жүлделі І, ІІ, ІІІ орындармен оралды.
Облыстық «Жыл әдіскері» байқауына қатысқан білім бөлімі әдістемелік кабинет әдіскері жүлделі І орынды иеленді. Ал облыстық әдістемелік орталық жас мамандарға арнап ұйымдастырған форумға №2, №5, №8, №9, №16, №18, №22 орта мектеп мамандары қатысып, жүлделі І орынды иеленді. Балаларға қосымша білім беру оқу әдістемелік және ғылыми практикалық орталығының ұйымдастыруымен өткен дебат жетекшілеріне арналған турнирде «Жылой фракциясы» жүлделі І орынға ие болды.
Облыстық мектепалды тәрбиешілеріне арналған «Педагогикалық идеялар панорамасы» конкурсынан №3 орта мектептің үш тәрбиешісі жүлделі І, ІІ, ІІІ орынды, облыстық «Жаңа формациядағы педагог психологі» байқауына қатысқан №13 жалпы орта мектептің психологі жүлделі ІІ орынды, облыстық «Үздік балабақша психологі» конкурсына қатысқан «Шапағат» балабақша психологі бас жүлде, облыстық «Жыл тәлімгері» байқауында №7 Е.Халықов атындағы орта мектеп тәлімгері жүлделі ІІІ орынды, облыстық «Математикалық регата» олимпиадасына қатысқан №19, №20, №23 орта мектептен құралған команда І орынды иеленіп қайтты. Ал республикалық олимпиадаға Атырау командасы құрамына енген №20 орта мектептің математика пәні мұғалімі жүлделі І орынды қанжығасына байлады.
Облыстық алғашқы әскери дайындық пәнінің жетекшілеріне арналған сайыста №1, №21 орта мектеп жетекшілері жүлделі І, ІІІ дипломмен, облыстық бастауыш сынып мұғалімдеріне арналған «Алтын тұғыр» олимпиадасына 16 мұғалім қатысып, жүлделі І, ІІ, ІІІ орындарды жеңіп алып, командалық есепте Жылыой ауданы «Ең үздік олимпиадалық команда» атанып, ІІ орынға ие болды. Жылыой ауданы әкімінің 2025 жылғы 27 мамырындағы №22 шешіміне сәйкес «Орта білім беретін үздік ұйым» конкурсына бес мектеп құжат тапсырды. Нәтижесінде жүлделі ІІІ орынға №1 орта мектеп, ІІ орынға №6 орта мектеп, І орынға №4 орта мектеп ие болды. Қалғаны Алғыс хатпен марапатталды. Комиссия қорытындысымен «№4 М.Әуезов атындағы жалпы орта білім беретін мектеп» жұмысы облыстық кезеңге ұсынылды.
Ерекше білім беруге – ерекше талап
Жалпы ауданда ерекше білім алуды қажет ететін 299 оқушы бар. Күні бүгін 64 оқушы үйден, 227 оқушы инклюзивті білім алады және 2 мектепте 8 оқушы арнаулы сыныптарда оқиды. Аудандағы ерекше білім алуды қажет ететін ел ертеңіне ғылыми негізгі пәндерден: соның ішінде үйден білім алатын балаға – 232 мұғалім, инклюзивті оқитын оқушыларға 760, арнаулы сыныптардағы (ЗПР,УО) балаларға 20 мұғалім сабақ береді.
Ерекше білім алуды қажет оқушылардың ерекшелігіне қарай ауданда №2 түзету кабинетінде 150 балаға қызмет көрсетілді. Бұл мекемеге «Самұрық-Қазынаның» демеушілігімен 150 орындық ғимарат салынып, биылғы жылдың қаңтарында пайдалануға берді. Онда ерекше балаларға толықтай жағдай жасалған, 12 қызметкер мамандар (логопед, дефектолог, олигофренпедагог, психологтар) жұмыс жасайды. Ерекше балаларды жыл сайынғы медициналық комиссиядан өткізу үшін ата-аналарға қолайлы жағдай жасау мақсатында биылғы қаңтарда «№5 Психологиялық-медициналық-педагогикалық консультация» мекемесі құрылды. Енді ата-аналар Атырау қаласына бармай-ақ аудан орталығынан өтуге мүмкіндік алды. Ол біздің ауданмен қатар мақаттық балаларды да қамтиды.
Бұған қоса, 16 Д.Жазықбаев атындағы, №7 Е.Халықов атындағы, №22, №23, №9, №10 Амангелді атындағы, №1 орта мектептерде ерекше білімді алуды қажет ететін балаларды қолдау кабинеті жұмыс жасайды. Онда ПМПК-ның қорытындысымен әр оқушыға педагог-ассистент тағайындалды. Әр оқушымен ABBLS жеке бағдарламасы арқылы жұмыс жасалып жатыр. Жаңа 2025-2026 оқу жылына «Samruk-Kazyna Trust» корпоративтік қорының демеушілігімен аудандағы №7, №8, №16, №18, №21 орта мектептерде КПИ кабинетін ашу жоспарланып отыр.
Ерекше білім алуды қажет ететін оқушылар үшін жыл сайын ұйымдастырылатын сайыстар мен байқауларға аудан балалары жоғары белсенділікпен атсалысып, жүлделі орындарды иеленіп жүр. Атап айтсақ, облыстық «Жұлдыз-ай» фестиваліне қатысқан №22, №23 орта мектеп оқушылары жүлделі ІІ,ІІІ орындарды иеленді.
ҚР Оқу-ағарту министрлігінің «2024-2026 жылдардағы жазғы демалыс кезінде балаларды сауықтырып, бос уақытын дұрыс өткізуге бағытталған республикалық іс-шаралар жоспарын» және облыстық Білім беру басқармасының 2025 жылғы 26 мамырдағы №100 бұйрығын іске асыру мақсатында Жылыой ауданы білім бөлімінің 2025 жылғы 27 мамырдағы №110 бұйрығы шығарылып, жүзеге асырылды.
Жалпы аудан бойынша өткен оқу жылында 1-10 сыныпта 17562 оқушы білім алды. Міне, осы ел ертеңін жазғы сауықтыру демалысымен қамту мақсатында мектеп жанынан тамақтандырылатын, тамақтандырусыз, қала сыртындағы сауықтыру демалыстары ұйымдастырылды. ҚР Денсаулық сақтау министрінің 2022 жылғы 10 тамыздағы №78 бұйрығына сәйкес әлеуметтік осал топ санатындағы 601 отбасының балалары да мектеп жанынан тамақтандыратын жазғы лагерьмен қамтылды. Жалпыға міндетті білім беру қоры есебінен 188 бала қала сыртындағы сауықтыру лагеріне жіберілді. Ресей Федерациясы Железноводск қаласындағы «Қазақстан геологі» емдеу пансионатына оқу жылының күзгі демалысында 180, қысқы демалыста 70, ал жазғы каникулда 196 оқушы демалып келді. Индер ауданындағы «Жас өркен» жазғы лагеріне 140 оқушы және Махамбет ауданы Сарытоғай елді мекенінде орналасқан «Арай» жазғы лагеріне 67 оқушы жіберілді. «Туған елге саяхат» жобасы аясында турға 1 оқушы, Орал қаласындағы «Атамекен» лагеріне 51 оқушы барып қайтты.Спорт және шығармашылық жетістіктеріне байланысты Қонаев және Щучинск қаласындағы «Балдәурен» лагеріне 23 оқушы, Түркістан облысындағы «Delve camp» лагеріне 24 бала жазғы демалысқа жолданды. Одан бөлек, киіз үй лагерімен 3200 оқушы, шатырлы лагерьмен 2300 және жазғы еңбек жасақтарымен 200 бала, көгалдандыру лагерімен 1300 шәкірт, бейіндік лагерьмен 9800 бала қамтылды.
Әртүрлі құқық бұзушылық жасағаны үшін ішкі істер бөлімі және мектепішілік есепке алынған оқушылар спорттық және көгалдандыру лагеріне жіберілді. Аудандағы қосымша білім беру ұйымдары базасында да жазғы лагерь ашылып, 300 оқушы музыка, ұлттық аспаптар мен қолөнер үйірмелеріне қатысты.
Оқулық және ыстық тамақпен қамту – басты назарда
Қазақстан Республикасы Білім және ғылым министрінің 2020 жылғы 22 мамырдағы №216 бұйрығын басшылыққа ала отырып «Е-таңдау» жүйесінде «Е-кітапхана» платформасымен әр мектеп әкімшілігі, пән мұғалімдері 2024-2025 оқу жылында 3-сынып, 2025-2026 оқу жылында 4-сынып оқулықтарына зерделеу жүргізіп, баспаларды таңдап, сұраныс берді. Жалпы аудан 2024 - 2025 оқу жылында 11 баспамен келісім шартқа отырып, оқулықтар мен оқу-әдістемелік құралдар алды. Күні бүгін оқушылар оқулықпен 100 пайыз қамтылды. Жаңа оқу жылында 3 баспамен келісім шарт жасалып, жетіспейтін оқулықтар мен оқу-әдістемелік құралдар және мектеп кітапханаларына көркем әдебиеттер алынып, жеткізілді.
ҚР Үкіметінің №64 қаулысымен бекітілген ережеге сәйкес әлеуметтік осал топ отбасыларынан шыққан 4720 оқушының ата-анасының жеке шотына 46 228 теңге көлемінде балаларына мектеп формасы мен құрал-жабдықтарын алу үшін қаражат аударылды. Сонымен қатар республикалық «Мектепке жол» акциясы барысында да әлеуметтік осал топ отбасы балаларына көмек көрсетілуде.
Оқулықпен қатар балаларды ыстық тамақпен қамту да маңызды саналады. Бұл мақсатта 2024-2025 оқу жылында аудандағы жалпы орта білім беретін 20 мектеп бойынша ұйымдастыру жұмыстары ұтымды жүргізілді. Осы оқу жылының басында мектептер бойынша 1-4 сыныптар аралығында барлығы 7950 оқушы, оның 1893 оқушысы аз қамтылған, 5-11 сыныптан мұқтаж 1585 оқушы, барлығы 9535 бала ыстық тамақпен қамтылып отыр. Әр маусымға арналған ас мәзірі мектеп басшыларымен келісіліп, апта сайын бекітіледі. Мектептердің интернет-ресурсына орналастырылған. Оқушыларға берілетін ыстық тамақтың құнарлылығына мектеп медбикелері күнделікті бақылау жасау үшін бекітілген, ал балалардың тамаққа қатысын қадағалауды сынып жетекшілері ұйымдастырады. 2024-2025 оқу жылы бойынша мектеп асханаларының барлығына «Alaqan» жүйесі енгізілді. Ыстық тамақ бойынша оқушылардың тамақ ішуі, шығарылатын, тапсырылатын есептердің барлығы осы жүйемен іске асырылуда.
Заманауи мектеп – сапалы білім мен саналы тәрбие беру кепілі
Ауданда сапалы білім беру үшін басты мәселе - заман талабына сай мектеп ғимараттарын салу екені белгілі. Құлсары қаласы – шағын шаһар ретінде жыл сайын қарышты дамып, халық саны өсіп келеді. Соған сай әлеуметтік саладағы сапалы қызметтер жоғары сұранысқа ие болуда.
Аудан орталығында соңғы екі жылда екі мектеп - №5 Абай атындағы 300 орындық, «Береке» ықшам ауданындағы 600 орындық №13 орта мектептің жаңа ғимараттары пайдалануға берілді. Бұдан басқа, «Жылыой ауданының 2023-2027 жылдарға арналған даму жоспарына» енгізілген №20 орта мектепке 180 орындық қосымша мектеп ғимаратының құрылысы жүргізіліп жатыр. Мемлекет басшысының 2022 жылғы халыққа Жолдауында айтылған «Жайлы мектеп» ұлттық жобасын орындау мақсатында «Атырау» ықшам ауданында жаңадан салынып жатқан 1200 орындық «Жайлы мектеп» құрылысы, 300 орындық Білім-инновациялық лицейінің құрылысы бар. «Болашақ», «Жадырасын» ықшам ауданынан 1200 орындық «BINOM", 600 орындық мектебі және Майкөмген ауылынан №17 орта мектепке 300 орындық жаңа мектеп салу жоспарланып отыр.
Сонымен бірге Құлсары қаласындағы су тасқынынан зардап шеккен №19 орта мектеп «Реновация» жобасы бойынша күрделі жөндеуден өтіп, материалдық-техникалық базасы толық жаңартылды. Жаңа оқу жылында оқушылар өз мектептерінде білім алатын болады. Сол сияқты №5 Абай атындағы орта мектеп ағымдағы жөндеуден өтті, 2025-2026 оқу жылында «Қазақстан халқына» қоры «Ауылдық жерлерде тірек мектептерінің әлеуетін дамыту» жобасы бойынша мектепті толық материалдық-техникалық базамен жабдықтайды.
Ауыл мектептерінің материалдық-техникалық базасын нығайту мақсатында 2024 жыдың тамыз айында облыстық бюджет есебінен ауылдық мектептерге 75 дербес компьютер жиындығы, қазан айында 50 заманауи интерактивті панель тақтасын алып бердік. «Сәби» қайырымдылық қорының қаржыландыруымен 3 орта мектеп пен 2 балабақшаға интерактивті тақта берілді.
2025–2026 оқу жылынан бастап ҚР Оқу-ағарту министрінің 26.05.2025 жылғы №123 бұйрығымен бекітілген бағдарлама «Адал азамат» біртұтас тәрбие бағдарламасы деп аталады. Бағдарлама бұған дейін іске асырылған бастаманың толыққанды жалғасы. Мақсаты – «Адал азамат» тұжырымдамасының идеалдарына сай, патриоттық рухта тәрбиеленген, білімді әрі жасампаз ұрпақты қалыптастыру. Жаңа оқу жылында негізгі 6 құндылық бойынша тәрбие бағытындағы жұмыстар өз жалғасын табады: тәуелсіздік және отаншылдық, бірлік және ынтымақ, әділдік және жауапкершілік, заң және тәртіп, еңбекқорлық және кәсіби біліктілік, жасампаздық және жаңашылдық.
Жаңа оқу жылының Білім күніне арналған алғашқы сабағы «Мектебім – мейірім мекені!» атты сынып сағатымен басталады. Біздің ендігі мақсатымыз - бойымыздағы барлық күш-жігерімізді жұмсап, заман талабына сай білім, тәрбие ісін жаңа сипатта дамытып, жарқын белеске көтеру. Сондықтан ел ертеңіне тәрбие беру мен оқытуда табысты нәтижелерге бірге жете берейік. Жаңа оқу жылы құтты болсын!
Гүлжансара Таңатарова, аудандық
білім бөлімі басшысының міндетін атқарушы
