«Шахмат дегеніміз – формасы бойынша ойын, мазмұны жағынан – өнер, ал ойынды меңгеру жағынан – ғылым» деген екен сонау кеңес дәуіріндегі әлем чемпионы Тигран Петросян. Әлем халқы шахматты ақыл-ойды дамытатын спорт түрі ретінде қарастырады. Демек, бұл ойын түрінің өскелең ұрпақтың сана-сезімін қалыптасырудағы пайдасы зор. Ендеше бізде «шаршы тақта «шайқасының» болашақ сардарлары бар ма?» деген орынды сауал туындайды.
Бір жақсысы, бар екен. 2018 жылы ашылып, өңірдің балғын спортшыларын осы шахмат ойынына баулып келе жатқан «Дарын» оқу орталығын біреу білсе, біреу білмес. Спорттың осы түрінен балғын дарындарды даралап шығарған орталықтың шахматшылары бес жылдың белесінде көптеген жеңісті жетістіктерге жетіп үлгерді. Мұның барлығы – жаттықтырушы Дарын Ғалимеденұлының тынымсыз төккен маңдай терінің жемісі.
Аудан бойынша алғанда, тек осы оқу орталығының шәкірттері ғана шахматтан облыстық, республикалық чемпионаттарға қатысып, топ жарып жүр. Мұндағы көптеген балғын спортшылардың IV,III, II, I шахмат талабына сай разрядтары бар. Сондай дүбірлі доданың бірі – өткен жылғы Тәуелсіздік күніне орай ұйымдастырылған "Теңізшевройл" ЖШС демеушілігімен өткен шахмат турнирі еді. Онда «Дарынның» балғын шахматшылары дараланып, тағы да жүлделі 1, 2-орындарды қанжығасына байлады.
«Дарыншылар» алға қарай бұдан да бәсекелі биік белестерді бағындыруға күш салып жатыр.
М.Таңатарова,
№21 орта мектеп мұғалімі
