Мамырдың 16-сынан бастап ауданда Ұлттық бірыңғай тестілеу басталды. Бұл - биылғы мектеп түлектеріне ақысыз мемлекеттік грант негізінде жоғарғы оқу орындарына түсуге мүмкіндік беретін сара сынақ.
Аудандық білім беру бөлімі әдістемелік кабинет меңгерушісі, комиссия мүшесі Айымгүл Қалиеваның берген мәліметіне сүйенсек, аудандағы Ұлттық бірыңғай тестілеу Құлсары қаласындағы N6 жалпы орта білім беретін мектеп базасында орналасқан N627 ҰБТ-ді өткізу орталығында өтіп жатыр. Биыл аудан мектептерін 902 түлек бітірсе, оның 815-і ҰБТ-ғы өтініш беріп, тіркелген. Тапсыратын түлектердің 577-сі қазақ тілінде, ал 238-і орысша тест тапсыруға бел буды. Мамырдың 16-сы мен 10 шілде аралығында өтетін ҰБТ екі кезеңде ұйымдастырылып жатыр.
Мемлекеттік сынақтың бірінші күнінде-ақ алғашқы үздіктердің есімі белгілі болды. Соның бірі - №19 орта мектептің 11 «А» сынып оқушысы Заманбек Сайлау. Мектеп түлегі ҰБТ сынағынан 132 ұпай жинап, ең жоғарғы көрсеткішке қол жеткізді.
Заманбек Альбарұлы - “Алтын түлек” математикалық олимпиадасының І республикалық кезеңінің жүлделі бірінші орын иегері, С.Өтебаев атындағы Атырау мұнай және газ университетінің толық оқу жылына арналған білім грантының сертификатымен марапатталған. Жас түлек Алматы қаласындағы Сүлеймен Демирел атындағы университеттің «Sotware engineering» мамандығына оқуға түсуді армандайды.
Біз де Заманбек Сайлауды үлкен жеңісімен құттықтап, білім жолындағы талабына тек қана жетістіктер ғана тіледік.
Е.ҚОШАҚАНОВ
