Өткен аптаның сейсенбі күні Сафи Өтебаев атындағы Жылыой мұнай және газ технологиялық колледжінде аудан колледждерінің арасында «Жас сарбаз» әскери патриоттық байқауы өтті. Германиядағы Кеңес әскерлері тобы мен Варшава Келісім шарты әскерлері тобы ардагерлерінің қолдауымен өткен додада үш бірдей колледж студенттері қатысып, бақ сынады. Байқау ардагерлер қоғамының және колледждің алғашқы әскери дайындық пәні мұғалімі Берік Биғалиевтің ұйымдастыруымен өтті. Білім ордасының акт залындағы шараға қоғам төрағасы Құттығай Ешібай бастаған ардагерлер, атап айтқанда Мұрат Жұмабаев, Қарағұл Қарымсақов, Нұрбай Бөлекбай, Сәрсенбай Сәбитаев, Мақсұт Майлыбаев, Жомарт Қайырғалиев пен Нұркен Рзабаевтар қатысып, жас өрендерге ақыл-кеңесін айтты.
Студенттер арасындағы қарым-қатынасты нығайтып, жастардың әскери сабаққа деген қызығушылығын оятып, ұлтжандылық сезімін арттыру мақсатын көздеген дода екі кезеңнен тұрды. Байқаудың ережесіне сәйкес екі ұл, екі қыздан құралған әр команда «Калашников» автоматын бөлшектеп, қайта жинақтаудан мықты дайындықтың үлгісін көрсетті. Алғашқы кезеңде бірыңғай ер балалар санаулы секундтар ішінде қаруды бөлшектеуде ептілігін көрсетсе, екінші кезеңде нәзік жанды студенттер де жігіттерден қалыс қалмады. Алғашқы әскери дайындық пәні мұғалімі Берік Сергейұлының айтуынша, мұндай жарыстар келесіде ауқымды түрде жоспарланып, эстафета ойындарына ұласады. Сондай-ақ байқау жөнінде ол: -Сайыс жақсы өтті. Әр колледжден қатысқан студенттер тың дайындықпен келгенін көрсетіп, қыздар жағы да бір-бірінен қалыс қалмады. Ерекше жылдамдықпен көзге түскен медициналық колледж студенті Динара Нухы 28,44 секундта қаруды бөлшектеп, қайта жинаса мұнай және газ технологиялық колледжінің студенті Фатима Асқарқызы 28,77 секундта үздік шықты. Ал жігіттер жағының мықты дайындықпен келгенін бірден аңғардық,-дейді.
Ұйымдастырушылар шешімімен жарыс соңында Сафи Өтебаев атындағы мұнай және газ технологиялық колледжінің студенттері Шапих Серікбай І орынға, Батырбек Қанатов пен Фатима Асқарқызы ІІ орынға, Жадыра Усманова Алғыс хатқа ие болды. Ал Темірхан Байсырымов атындағы гуманитарлық-техникалық колледжінің студенттері Нұржан Бейболұлы мен Ақмарал Жолдасқызы ІІІ орынды жеңіп алса, Наурызбек Ертілеу мен Ұлболсын Бошан Алғыс хатты қанағат тұтты. Сондай-ақ ауданның болашақ дәрігерлері - медициналық колледж студенттері Динара Нухы жүлделі І орынды иеленіп, Асылбек Сламғали, Мейірбек Самархандұлы мен Ақбөбек Жеңісқызы алғысхатпен марапатталды. Қатысушылардың барлығы ГКӘТ және ВКШӘТ қоғам ардагерлері атынан дипломмен марапатталып, арнайы сыйлықтарға ие болды.
Д.ІЗБАСАРҚЫЗЫ
