Жуырда аудан әкімдігінің мәжіліс залында қоғамдық кеңестің кезекті отырысы болып өтті. Онда кеңестің мүшелері аудандық білім бөлімі басшысының міндетін атқарушы Гүлжансара Таңатарованың баяндамасын тыңдады. Күн тәртібіндегі мәселелерді таныстырған қоғамдық кеңестің төрағасы Бекет Құлбаевтың сөзінен талқыланатын негізгі тақырып – сыбайлас жемқорлыққа қарсы іс-қимыл мәселесі екенін білдік.
Жемқорлықтың жолын кесу үшін...
Мінбеге көтерілген аудандық білім бөлімі басшысының міндетін атқарушы Гүлжансара Таңатарова бұл жөнінде былай деді:
- Қазіргі уақытта қоғамымызды қатты алаңдатып отырған келеңсіз көріністің бірі - сыбайлас жемқорлық. ҚР «Сыбайлас жемқорлыққа қарсы іс-қимыл туралы» 2015 жылғы 18 қарашадағы заңды басшылыққа алған білім бөлімінде сыбайлас жемқорлық көріністеріне төзбеушілікті қалыптастыру жөнінде іс-шаралар жоспары жасалып, бекітілді. Ауданымызда 20 жалпы орта білім беретін мектеп, 24 балабақша (оның үшеуі – жекеменшік), мектептен тыс 4 мекеме және №2 педагогикалық-психологиялық түзету кабинеті жұмыс жасайды. Барлық мектеп ғимаратында «Парасатты азамат», «Адал ұрпақ» ерікті мектеп клубы, «Сенім телефондары» «Ақша жинауға тыйым салынады» тақырыбында стенділер жасақталған және сыбайлас жемқорлыққа қарсы CALL орталығының бірыңғай 1424 нөмірі бейнеленген баннерлер ілінген, Мемлекеттік қызметкерлердің Әдеп кодексі және қоғамда сыбайлас жемқорлықтың көріністеріне «мүлдем төзбеушілік» ахуалын қалыптастыруды арттыру мақсатында ҚР Мемлекеттік қызмет істері агенттігінің «Мемлекеттік қызмет алушылардың құқықтары» және «Пара беру бас бостандығыңнан және болашағыңнан айырады» тақырыптарында әзірлеген жадынамалары ғимаратта көрнекі жерде ілінген. Балабақшалар мен мектептерде болашақ жеткіншектердің сыбайлас жемқорлық жағдайларын болдырмау мақсатындағы түсініктерін кеңейтуге бағытталған әртүрлі сайыстар мен шаралар ұйымдастырылды.
Білім беру ұйымдарында жылдық жұмыс жоспарға сәйкес ведомствоаралық бірлескен ашық алаңдар, «дөңгелек үстелдер», семинарлар, кездесулер, сынып сағаттары, пікірсайыстар ұйымдастырылды. Сонымен қатар, «Адал ұрпақ – ел болашағының кепілі», «Ел ертеңі – бүгінгі ұрпақ», «Айбынды елдің ұланы – адал болу ұраны», «Жемқорлыққа жол жоқ!», «Қазақстан-құқықтық мемлекет» атты іс-шаралар өткізілді. Ұйымдастырылған барлық шаралар білім беру ұйымдарының әлеуметтік желілеріне жарияланды. Сыбайлас жемқорлыққа қарсы күрес бағытында ата-аналар мен мектеп қызметкерлерінің қатысуымен «Қоғамдағы жемқорлыққа төзбеушілік» тақырыбында ақпараттық-түсіндірмелік жұмыстар жүргізіліп келеді.
Аудандық білім бөлімі бойынша Қазақстан Республикасының 2020 жылғы 24 сәуірдегі №158 «Мемлекеттік қызметтер туралы» заңына, білім және ғылым саласындағы мемлекеттік қызмет регламенттері мен стандарттарына сай аудандық білім бөлімі және оған бағынысты ұйымдар 21 мемлекеттік қызмет көрсетеді. Биылғы жылдың қаңтар-маусым айында 2330 мемлекеттік қызмет көрсетілді. «Цифрлық Қазақстан» мемлекеттік бағдарламасын жүзеге асыру, өңір тұрғындары арасында сыбайлас жемқорлыққа қарсы мәдениетті қалыптастыру және білім беру саласындағы электрондық мемлекеттік қызметтердің үлесін арттыру мақсатында автоматтандыруға және цифрландыруға қызмет көрсететін компаниялармен бірлесіп, білім бөлімінің іс-шараларын орындауға қол жеткізілді. «Интегро» кешенді ақпараттық жүйелері» ЖШС Атырау облысы әкімі аппаратының тапсырмасымен мемлекеттік қызметтерді электрондық түрде автоматтандыру үшін «Атырау облысының мемлекеттік қызметтер порталын» (e-gyzmet.kz) жасақтады. Айталық, мектепке дейінгі білім беру ұйымдарына қабылдау өзгертілді. Тәрбиеленуші балабақшаға қабылдану үшін - INDIGO жүйесі арқылы кезекке тұрады. INDIGO - мектепке дейінгі білім беру ұйымдарына арналған автоматтандырылған жүйе. Сол арқылы жолдама алып, электрондық түрде пайдаланушының жеке кабинетінде авторизациялау арқылы балабақшаға орналасу іске асырылады. Қазіргі таңда ауданға қарасты мектепке дейінгі білім беру ұйымдарына тәрбиеленушілер автоматтандыру жүйесі арқылы қабылданып, балабақшада тәрбиеленуде.
Білім беру ұйымдарында бірінші сыныпқа қабылдау Қазақстан Республикасы Білім және ғылым министрінің 2018 жылғы 12 қазандағы №546 бұйрығы негізінде жүзеге асырылады. 2025-2026 оқу жылына бірінші сыныпқа құжат қабылдау 1 сәуірден 31 тамызға дейін жүргізіледі. Ата-аналар балаларының құжаттарын электрондық үкіметтің egov.kz веб-порталы арқылы тіркеп, өтініш беріп, 1 сыныпқа қабылдану үстінде,- деп аяқтады сөзін Гүлжансара Қалиқызы.
«Жадырасыннан» мектеп салынады,
«Мұрагердегі» балабақша бұзылмайды
Баяндама аяқталғаннан кейін қоғамдық кеңес мүшелері тарапынан бірнеше сұрақтар қойылып, ұсыныс-пікірлер айтылды. Әсіресе №7 Е.Халықов атындағы орта мектеп пен «Қызғалдақ» балабақшасындағы кәріз жүйесінің мәселесін көтерді. Аудандық білім бөлімі басшысының міндетін атқарушы Гүлжансара Қалиқызы бұл сауалдарға орай:
- Қазіргі уақытта білім беру ұйымдарының бірқатары орталық кәріз жүйесіне қосылған. Алайда кейбір мектептерде мүмкіндік жоқ. Ондай ұйымдардың әрқайсысында жеке септик жүйелері бар. Бұл жүйелер толған жағдайда аудандағы "ЖылыойСу" мекемесінің вакуумдық техникасы арқылы кәріз қалдықтары шығарылып тұрады. Алдағы уақытта мүмкіндігі бар білім мекемелерін орталық кәріз жүйесіне кезең-кезеңімен қосу жұмыстары жүргізілуде,- деп жауап берді. Қоғамдық кеңестің төрағасы Бекет Құлбаев №7 орта мектептегі желдету жүйесіне де тоқталды. Бұл сауалға:
- Жақында ғана күрделі жөндеуден өтіп жатқан «Достық» ықшам ауданындағы №19 орта мектепке арнайы барып, желдету жүйесінің жағдайымен таныстық. Бұл мектеп 2003 жылы пайдалануға берілген. Климатымыздың қолайсыздығынан табиғи желдету жүйесін тиімді пайдалану мақсатында терезелер ашылатындай етіп жасалды. Қосымша қаражат бөлініп, желдету жүйесі де орнатылды. Қазіргі таңда бұл толыққанды нәтиже бермесе де, жұмыс жасап тұр. Мектеп алдағы уақытта толықтай күрделі жөндеуден өтетін болады және желдету жүйесі жаңартылып, толық іске қосылады,-деді Гүлжансара Қалиқызы.
Қоғамдық кеңес мүшелері аудандық білім бөліміне қарасты былтырғы су тасқыны салдарынан зардап шеккен ғимараттардың жай-күйі жайлы да сұрап, «Жадырасын» ықшам ауданы тұрғындарының балалары үшін салынуы тиіс жаңа мектептің құрылысы хақында да хабар білгісі келді. Бұл сауалға ол:
- №19 орта мектептің күрделі жөндеу жұмыстары биылғы жаз айында толық аяқталады деп жоспарлануда. Ал «Мұрагер» ықшам ауданындағы «Салтанат» балабақшасы облыс әкімінің жеке бақылауында. Арнайы комиссияның құрамындағы облыс әкімінің орынбасарлары, құрылыс басқармасы, аудан әкімдігі және басқа да құрылымдардың қатысуымен зерделеу жұмыстары жүргізілді. Қорытындысында балабақша бұзуға емес, күрделі жөндеуге жатады деген шешім қабылданды. Қазіргі уақытта жөндеуге қажетті қаражатқа бюджеттік өтінім берілді. Мәселе мәслихат сессиясында қаралады. Егер өтінім мақұлданса, мектепке дейінгі мекемені сақтап қалуға бар күшімізді саламыз. Ал «Жадырасын» ықшам ауданынан жаңа мектептің құрылысын салу мәселесі ауданның бас жоспарына енгізілген. Қазіргі уақытта жобалық-сметалық құжаттамасы дайындалып, мемлекеттік сараптамадан өтуде. Құжат мақұлданғаннан кейін құрылыс жұмыстары жоспарға сай басталады,- деді ол.
Отырыста білім беру саласына қатысты өзекті мәселелер кеңінен қаралып, қоғамдық кеңес мүшелері тарапынан бірқатар маңызды сауалдар қойылды. Нақтырақ айтқанда, кәріз жүйесі, желдету жүйесінің тиімділігі, су тасқынынан зардап шеккен нысандардың жағдайы, оқулықпен қамтамасыз ету және жаңа мектеп құрылысы сынды өзекті тақырыптар талқыға түсті. Бұл мәселелер қоғамдық кеңестің бақылауында болатыны айтылып, тиісті деңгейде шешілуі үшін қажетті шаралар қолға алынатынын мәлім етті.
Отырысты қоғамдық кеңес төрағасы Бекет Құлбаев қорытындылады.
А.МОЛДАШЕВ
