.
Президент Қасым-Жомарт Тоқаев ұстаздардың Республикалық тамыз конференциясына қатысты. Ал биылғы жиын «Білім келешегі: адал азамат, кәсіби маман» тақырыбына арналды. Бұл тақырып елдің болашағын қалыптастыруда мұғалімдердің рөлі мен жауапкершілігін ерекше айқындап, сапалы білім мен адамгершілік тәрбие берудің маңыздылығын көрсетеді.
Конференция барысында Президент Қасым-Жомарт Тоқаев ұстаздардың қоғамдағы орны мен маңызды миссиясын атап өтті:
- Ең алдымен, баршаңызға дәстүрлі Тамыз конференциясының ашылуы құтты болсын! Бұл – өскелең ұрпаққа сапалы білім мен тағылымды тәрбие беру мәселесіне арналған өте маңызды басқосу. Ұстаз – ұлттың шамшырағы. Сіздер күнделікті қажырлы еңбектеріңіз арқылы ел дамуына өлшеусіз үлес қосып келесіздер. Жас ұрпақтың бойына білім нәрін сеуіп, озық ойлы ұлт тәрбиелеп жүрсіздер. Халқымыздың зияткерлік қуатын арттыруға белсене атсалысып жатсыздар. Бүгін мен еліміздегі ұстаздар қауымына шынайы ризашылығымды білдіремін! Шын мәнінде, Мұғалімдер мемлекеттік маңызы бар жұмысты атқарып жатыр. Ыбырай Алтынсарин «Жақсы оқытушыны бәрінен де қымбат көремін» деген. Елдің ертеңі мұғалімдерге тікелей байланысты. Сондықтан ұстаздың қоғамдағы орны бәрінен биік болуға тиіс.
Расында, бұл сөздер конференцияның негізгі мақсаты – «адал азамат, кәсіби маман» тәрбиелеу жолындағы ұстаздардың рөлін нақты көрсетеді және олардың еңбегі елдің болашағына тікелей ықпал ететінін дәлелдейді. Ұстаздардың күнделікті қажырлы еңбегі арқылы оқушылар тек білім алып қана қоймай, адамгершілік пен адалдық сияқты өмірлік құндылықтарды да бойына сіңіреді.
Демек, биылғы Республикалық тамыз конференциясы ұстаздардың кәсіби шеберлігін арттыруға, оқушыларды сапалы біліммен қамтамасыз етуге және адал азаматтарды тәрбиелеуге айтарлықтай үлес қосатын маңызды шара болып отыр. Елдің болашағы – ұстаздардың еңбегі мен жауапкершілігіне тікелей байланысты екені тағы бір мәрте дәлелденді.
