Мемлекет басшысы Қасым-Жомарт Тоқаев «Білім келешегі: адал азамат, кәсіби маман» тақырыбындағы тамыз конференциясының пленарлық отырысында «Қазір – білім мен ғылымның заманы. Жаһандану дәуірінде озық білімді игерген, жаңа технологияны меңгерген елдің ұпайы түгел болады. Бүгін саналы ұрпақ тәрбиелей алсақ, ертең заман көшінің басында жүреміз. Сондықтан осы саланы қолдау мемлекеттік саясаттың негізгі басымдығы болып қала береді»деген еді. Бұл тағылымды пікір ауданымызда өткен тамыз кеңесінде тағы бір мәрте тыңдалды. Ұстаздар қауымының басы қосылған алқалы отырыста өткен оқу жылының қорытындысы сараланып, алда тұрған міндеттер мен стратегиялық бағыттар айқындалды.
Дәстүрлі жиын ҚР Президентінің құттықтау сөзімен басталып, бейнеролик арқылы жалғасын тапты. Мұнда облыстық Білім беру басқармасының басшысы Марат Әбуов, аудан әкімі Жұмабек Қаражанов және аудандық білім бөлімі басшысының міндетін атқарушы Гүлжансара Таңатаровалар, сондай-ақ қала, ауыл әкімдері, мектеп және қосымша білім беру ұйымы директорлары, балабақша меңгерушілері, ұстаздар және бұқаралық ақпарат құралдарының өкілдері қатысты. Алдымен мұғалімдерді алдағы оқу жылымен құттықтаған Гүлжансара Қалиқызы:
-Ел Президенті Қасым-Жомарт Тоқаев Республикалық тамыз конференциясында сөйлеген сөзінде «Шын мәнінде, мұғалімдер мемлекеттік маңызы бар жұмысты атқарып жатыр. Ыбырай Алтынсарин «Жақсы оқытушыны бәрінен де қымбат көремін» деген. Елдің ертеңі мұғалімдерге тікелей байланысты. Сондықтан ұстаздың қоғамдағы алатын орны бәрінен биік болуға тиіс» деген болатын. Оның үстіне биылғы оқу жылы ҚР Конституциясының 30 жылдық мерекесімен тұспа-тұс келе жатыр. Сондықтан баршаңызды осы мерейлі мейраммен және жаңа 2025-2026 оқу жылының басталуымен құттықтаймын. Еңбектеріңізге толағай табыс, шығармашылық шабыт тілеймін. Әрқашан бізді биікке көтеретін аяулы шәкірттеріміз аман болсын. Өздеріңіз білесіздер, биыл еліміздің бас қаласы – Астанада тамыз конференциясы өте ерекше өтті. Олай деген себебім, бұл маңызды іс-шарада Мемлекет басшысы біздерге нақты тапсырмалар беріп, жауапкершілігі мол міндеттерді жүктеді. Сол айтылған тұжырымдарды негізге ала отырып, өздеріңізге өзекті мәселелерді атап өткім келіп отыр. Республикалық тамыз кеңесінде 5 мәселе қаралған болатын. Олардың біріншісі – білім сапасын жетілдіру. Ал білім сапасы тек қана мұғалімдердің біліктілігін арттыру негізінде жүзеге асады. Екінші мәселе ауыл мен қала мектептерінің теңдігін, біртұтастығын жүзеге асыру. Бізде қалада 13 жалпы орта білім беретін мектеп болса, ауылдық жерлерде 7 білім беру ұйымы жұмыс жасайды. Үшінші, тәрбие мен білімді жүзеге асыру. Екеуі біртұтас болғанда ғана берекелі, сапалы білім болады. Бұл жерде отбасы, мектеп, мемлекет болып жұмыла жұмыс жасаған жөн. Осындай үштік арқылы жас ұрпақтың зейінін ашып, білім алуға деген құлшынысын оята аламыз. Төртіншіден, өсіп келе жатқан жас жеткіншектерді әлеуметтік келеңсіздіктерден қорғау. Бұл жерде алдыңғы орында баланың денсаулығы мен қауіпсіздігі тұратындығы рас. Және Президентіміз айтқандай, заң және тәртіп қағидатымен жұмыс жасауымыз керек. Бесіншіден, барлық білім беру ұйымдарында цифрлық технологияны қолдана отырып, жасанды интеллектіні енгізу. Міне, осындай жүйемен жұмыс жасасақ, біз алдыңғы қатарлы ұстаз бола аламыз және абыройлы маман иесі атанамыз. Ендеше, алдағы оқу жылына өзгеріс енгізейік. Бәрі де өзіміздің қолымызда,-деді өз сөзінде.
Және «Ауданның білім беру саласы: мәселелер мен шешімдер және 2024 - 2025 оқу жылының қорытындысы» тақырыбындағы бейнеролигін ұсынды. Онда білім беру саласын жаңа деңгейге өсіру үшін қолданылатын нақты жоспарлар көрсетілді. Олар: білім сапасын арттыру мақсатында оқыту мен бағалаудың тиімді әдіс – тәсілдерін жүйелі енгізу; оқушылардың функционалдық сауаттылығын дамыту бағытында пән мұғалімдерінің кәсіби дамуына жағдай жасау; жас мамандарды қолдау мен бейімдеу бағдарламаларын іске асыру; оқушылардың қауіпсіздігін қамтамасыз ету және инклюзивті білім беру ортасын дамыту; оқушылар арасында біліммен қатар ұлттық тәрбие мен адамгершілік құндылықтарды сіңіруге бағытталған іс-шаралар өткізу; пәндер бойынша мұғалімдерге арналған аудандық шығармашылық топ құрып, авторлық бағдарламалар мен озық тәжірибелерді бөлісу; оқушылардың цифрлық сауаттылығын дамыту мақсатында ІТ байқаулар, жобалық жарыстар ұйымдастыру, цифрлық педагогикалық құзіреттілікті арттыру мақсатында тәжірибелік семинарлар мен тренингтер өткізу, сондай-ақ, «ДОСБОЛLIKE» антибуллингтік бағдарламасы арқылы жас ұрпақтың құқықтары мен мүдделерін қорғау жүйесін жоспарлы түрде жетілдіру.
Жаңа оқу жылымен ұстаздарды аудан әкімі Жұмабек Байрақбайұлы мен облыстық Білім беру басқармасының басшысы Марат Әлменұлы да құттықтап, жиналғандарға жылы лебіздерін жаудырды. Аудан әкімі өз сөзінде:
- Жылыой ауданында білім саласында бірқатар жұмыстар атқарылуда. Атап айтсам, биыл қаламызда ерекше балаларға арналған 150 орындық түзету кабинетін аштық. Одан бөлек, «Береке» ықшам ауданында 600 орындық жаңа мектеп пайдалануға берілді. Қазіргі таңда «Жайлы мектеп» жобасы аясында 1200 орындық мектеп пен 300 орындық Білім-Инновация лицейінің құрылысы жүріп жатыр. Сонымен қатар жаңа мектептер мен балабақша салу жоспарда бар. 2026 жылдан бастап Майкөмген ауылында 300 орындық мектептің құрылысы басталатын болады. Бұл ауданымыз үшін жағымды жаңалық болғалы тұр. Әрине, жастар – біздің болашағымыз. Сондықтан оларға құйған инвестиция келешекте өзімізге жеміс береді. Бұл ретте жас мамандар мен тәжірибелі ұстаздарға да сенімім мол. Мемлекет басшысы Қасым-Жомарт Тоқаев айтқандай, кешегі ілім ертеңгі күнімізге қажет болмай қалуы мүмкін. Сондықтан білім көшінен қалмай, қашанда ізденісте болып, үлгеріп отыруымыз қажет. Заман талабына бағынып, цифрлы жүйені зерттеп, жасанды интеллектіні тиімді пайдаланғанымыз жөн. Сіздердің бала тәрбиесінде алар орындарыңыз жоғары. Мұндайда Алаштың күн келбетті ақыны Мағжан атамыздың «Алты Алаштың басы қосылса, төр – мұғалімдікі» деген есті сөзі ойға орала қалады. Бәрі де сіздерден бастау алады. Сондықтан дендеріңізге саулық, жанұяларыңызға амандық тілеймін. Алдағы оқу жылын сәтті бастап, табысты аяқтайық,-деді құттықтау тілегін жеткізіп.
Және жас ұрпаққа сапалы білім мен саналы тәрбие беріп, жан-жақты тұлға қалыптастыруда шәкірттерді білім нәрімен сусындатып, одан бөлек республикалық олимпиада, сайыстарға оқушы дайындап, жетістікке жетіп жүрген ұстаздарды марапаттады. Сондай-ақ Жұмысшы мамандықтарының жылында сүбелі қызмет етіп, жұмысшы мамандардың еңбегін насихаттау жолында адал қызмет атқарған бірнеше маманға да Алғыс хат табыстады. Бұл көштен еңбегі еленген, жетістігімен дараланған педагогтар де қалыс қалмады. Атап айтсақ, Досбек Қызылқұлов Оқу-ағарту министрлігінің орта білім беру комитетінің Алғыс хатына ие болса, Гүлбаршын Бермағамбетова облыс әкімдігі атынан марапатқа ие болды. Ал 100-ге жуық маман облыстың білім беру саласын дамытуға қосқан үлесі мен шығармашылық жетістіктері үшін облыстық Білім беру басқармасы атынан Құрмет грамотасы мен Алғыс хатына ие болды.
Іс-шарада «Жаңа мектеп» жобасы аясында «Кәсіби даму: Үздік тәжірибе – тұрақты қолдау» тақырыбында №7 Е.Халықов атындағы жалпы орта білім беретін мектеп директоры Майра Бейісова сөз сөйлесе, «Адал азамат- біртұтас тәрбие» бағдарламасы аясында «Жан-жақты дамыған ұрпақ - сапалы тәрбиенің нәтижесі» тақырыбында №4 М.Әуезов атындағы жалпы орта білім беретін мектеп директорының тәрбие ісі жөніндегі орынбасары Нұргүл Табылғанова тағылымды ойымен бөлісті. Ал С.Өтебаев атындағы Жылыой мұнай және газ технологиялық колледжінің өндірістік оқу жөніндегі орынбасары Римма Кенжеғалиева жұмысшы мамандықтар жылына орай «Адалдық пен кәсіп - жас ұрпақтың табысты болашағының кепілі» тақырыбында өз баяндамасын ұсынды. Және өңіріміз үшін маңызды колледждің өткені мен бүгінін саралап:
- Өткен жылы біздің оқу орнымызға 130-ға жуық талапкер орналасқан болатын. Биыл ол сан 150-ден асты. Десек те, бұл әлі көңіл көншітер көрсеткіш емес. Әрине, ауданымызда жыл сайын қаншама түлек жалпы орта білімін аяқтап, үлкен өмірге қадам басады. Десек те, олардың арасынан бізге келіп орналасатындары аз. Бұл жастардың көбіне үлкен қалаларға қызығушылық білдіретіндіктерінен болса керек. Бірақ өзіміздің өлкеде де жақсы маман иесі атанып, тіпті, бірден жұмысқа орналасып кетуге болатынын да ұмытпаған жөн. Біз қазіргі таңда дуалды оқыту жүйесі аясында қаншама компаниялармен байланыс орнатып, студенттеріміздің тәжірибе жүзінде жұмыс жасап, жұмысқа орналасуына жағдай жасап отырмыз. Бұл жүйе алдағы уақытта өз аясын кеңейтетіндігі тағы бар. Тек жастардың туған жерінде білім алуға деген құлшынысы аз болып тұр,-дейді өз сөзінде.
Ұлағатты ұстаздар жиналған жиында әсем ән қалықтап, күй шалқыды. Атап айтсақ, жергілікті әнші Асқар Қоңыров «Атамекен» әнін нақышына сай орындаса, Жайна Нұрханова «Аяулым» әнімен көптің көңілінен шықты. Бұл ретте «Жем аруы» халықтық би ансамблі де қалыс қалмай, иірімді икемдерімен «Тойбастар», «Хорезм» билерін тамаша сахналады.
Иә, ел болашағы – ұстаз қолында. Бүгінгі тамыз кеңесінде көтерілген мәселелер мен белгіленген міндеттер ертеңгі күннің табысты нәтижесіне жол ашпақ. Оның үстіне дәстүрлі тамыз кеңесі тек есеп пен қорытынды жасау емес, сонымен қатар, әр мұғалімге жаңа күш-қуат, кәсіби шабыт сыйлайтын игілікті жиын. Биылғы кеңес те осы үрдістен жаңылмай, ұстаздардың еңбегін бағалап, қоғамдағы мәртебесін тағы бір мәрте айшықтап берді. Ендеше, саналы ұрпақ тәрбиелеу жолындағы еңбегімен дараланған мұғалімдердің мерейі әрдайым үстем болсын!
Д.ІЗБАСАРҚЫЗЫ
