Қазақ халқының әдет-ғұрып, салт-дәстүрін қыз баланың бойына сіңіріп, оған келешек ана ретінде қоғамның, елдің, ұлттың алдындағы жауапкершілік сезімін жеткізу және әдепті, сыпайы, адамгершілігі мол, білімді, жан-жақты жетілген қыз тәрбиелеу – ана үшін аса маңызды. Міне, осы мақсатты көздеген «Әсем» бөбекжай-бақшасында «Қыз тәрбиесі – ұлт тәрбиесі» атты «дөңгелек үстел» өтті.
Бүлдіршіндердің екінші үйіне айналған балабақшадағы шарада аталмыш мектепке дейінгі мекеменің 3-4, 4-5 жас аралығындағы тәрбиеленуші топтардың аналары белсенділік танытты. Ұйымдастырушы тәрбиеші Бибігүл Абилова қатысушыларға арнап түрлі ойындар дайындап, «дөңгелек үстелдің» жоғары деңгейде өтуіне бар күш-жігерін салды.
Шара, алдымен, аналар қауымы мен кішкентай қыздардың орындауындағы «Қамажай» биімен басталды. Сөз алған тәрбиеші аналарға арналған «Ақ жол» тренингін ұйымдастырды. Онда аналар арнайы дайындалған матадағы ақ жолмен жүрген сайын өз балаларына арналған ақжарма тілегін ақтарып отырды. Әрі қарай шара мақал-мәтелді сурет бойынша құрастыру, қыз баланы тазалық сақтауға үйрету үшін шаш өру, қазақ халқының көне өнерін жандандыру үшін киіз басу, ұлттық тағамның пайдасын білуге құрт жасау сияқты қыз тәрбиесіндегі қазақтың қанына сіңген тірліктерді қамту мақсатында тапсырмалар берілді. Онда аналар мен қыздардың бірігіп жасаған жұмыстары тәрбиешінің көңілінен шығып жатты. Сондай-ақ аналар ұяшық арқылы өздеріне түскен сұрақтарға еркін жауап беріп, өз ойларымен бөлісті. Оларға «Қыз бала тәрбиесінде ананың рөлі қандай?», «Қыз баласын еңбекке қалай баулуға болады?», «Екі қыздың баласы бір-біріне кім болады?» деген сұрақтар қойылды. Және қиялдарына ерік беріп, түрлі түсті қағаздан бала бейнесін жасаған олар өз жұмыстары арқылы балаларын қалай тәрбиелеп жатқандығын жеткізді.
«Дөңгелек үстел» соңында аналар шараның қызықты өткендігін жеткізіп, қыздарымен бірге жасаған тапсырмаларды ұйымдастырғаны үшін тәрбиешіге алғыс білдіріп, риза болып тарқасты.
Д.ІЗБАСАРҚЫЗЫ
