Жаңа оқу жылы қарсаңында ҚР Үкіметінің №64 Қаулысына сәйкес, ауданда әлеуметтік жағдайы төмен 3064 оқушы біржолғы қаржылай көмекпен қамтылуы тиіс. Бұдан бөлек, елімізде республикалық «Мектепке жол» қайырымдылық акциясы бастау алды. Осы акция аясында қаладағы мектептердің оқушылары, әсіресе, су тасқыны кезінде үйлері тілсіз жаудан зардап шеккен ата-ананың балалары айрықша қамқорлыққа алынды. 1 қыркүйек – Білім күні қарсаңында оларға тегін арнайы оқу-құралдарымен бірге мектеп сөмкелері үлестірілді.
Иә, көктемгі тасқын судан қатты зардап шеккен білім ордасының бірі - №8 орта мектеп. Күрделі жөндеу жұмыстары жүріп жатқан мұндағы білім ордасының ғимаратына мектеп табалдырығын енді аттағалы тұрған 1 сынып оқушылары жиналды. Олармен кездесіп, көңілдерін көтеру үшін «Каспий Құбыр Консорциуымы-К» акционерлік қоғамының өкілдері де келді. Жүректері алып-ұшып, өмірінің жаңа парақшасын ашқалы тұрған бүлдіршіндерге сәттілік тілеу үшін аталмыш компания өкілі Ботагөз Шарденбаева сөз сөйледі:
–Алдағы оқу жылында сабақтарыңды жақсы оқып, білімді азаматтар болып шығуларыңа тілектеспін. Болашақ сендердің қолдарыңда. Сондықтан елдің өркендеуі жолында алға ұмтыла беріңдер,-деген ол алдын ала дайындаған базарлығы барын жеткізді.
Компания қызметкерлері сол жерде балаларға мектеп құралдары салынған әдемі сөмкелерді табыс етті.
«Каспий Құбыр Консорциуымы - К» АҚ бұдан бөлек қаладағы №1, 19, 7 оқу ордаларында болып, мектеп табалдырығын алғаш рет аттағалы тұрған бүлдіршіндерді құттықтап, 370 балаға оқу құралдары мен сөмкелерді сыйға тартты.
Қайырымдылық акциясы қыркүйек айының соңына дейін жалғасатын болады. П.ТӘЖІ
