Жақында аудандық балалар кітапханасының тұрақты оқырмандарының қатысуымен «Бақыт пен шаттық мерекесі» тақырыбында бата беруден сайыс өтті. Шараның мақсаты – кішкентай оқырмандардың санасына ұлттық құндылықтарды сіңіре отырып, ата-баба дәстүрін жалғастыру. Сондай-ақ, өскелең ұрпаққа дүниеге келгеннен бастап берілетін бата мен тілектерді оқуға баулу, көркемсөз оқу шеберлігін шыңдау, танымдық ой-өрісін арттыру.
Аталған шара барысында балалармен жұмыс әдіскері Бөбек Лауадинқызы әсіресе Наурыз бен Амал мерекесіндегі көрісу күнінде берілетін бата-тілектердің мән-мағынасы туралы оқырмандарға түсіндіріп берді. Шараға қатысқан №20 мектептің 3-сынып оқушылары Елтай Медина «Тұсау кесер», Раяна Ақылбекқызы «Наурыз бата», Гүлім Төлеміс «Жас келінге бата», Үмбет Сағадат «Ақсақалдың батасы», Мұрат Қоқымбай «Досмайылдың батасын» жатқа айтып берді. Ал Айзере Садыққызы «Жас отауға берілетін бата», Самиғат Нәбидуллин «Төле бидің Қазыбек биге айтқаны», Сәндібай Саят «Үй иесіне берілетін бата», Айлин Ерсайынқызы «Соғымға бата», «Көшке бата» беріп, ыстық ілтипатқа бөленді.
Аудандық балалар кітапханасының меңгерушісі Айгүл Нұржанқызы шараны қорытындылап, оқырмандар мен кеш қонақтарына жүрекжарды жылы лебізін білдірді. Ата-аналар мен сынып жетекшісі Ботагөз Қарамұратова балалардың білімін шыңдауда атқарылып жатқан игі істері үшін кітапхана ұжымына алғыс сезімдерін білдірді.
Ақбота Ақбөкен
