Ауданда наурыз-сәуір айларында өткен ақылы Ұлттық бірыңғай тестілеу мектеп бітіруі жақын түлектер үшін маңызды көп сынақтың бірі болды. Бұл кезеңде талапкерлер он бір жыл бойы алған өз білім деңгейін көрсетумен бірге үздіксіз дайындығының нәтижесін білді. Арасында межелі 140 ұпайға жетпесе де, 130, 131, 133 ұпай жинаған оқушылар кездесіп, өңірдің білім сапасына жағымды жаңалығын ала келді. Аудандық білім бөлімінің әдістемелік кабинет меңгерушісі, комиссия мүшесі Айымгүл Қалиеваның хабарлауынша, Құлсары қаласындағы №6 жалпы орта білім беретін мектеп базасында өткен ақылы ҰБТ-ға биыл 680 түлек қатысып, олар жалпы есеппен 37 532 ұпай жинаған.
Еске салсақ, бұл тест емтихан нәтижесі тек ақылы оқуға ғана жарамды. Ал нағыз мемлекеттік тестілеу 16 мамыр мен 5 шілде аралығында өтеді. Мұнда ұл-қыздар қай күні сынақ тапсырғысы келетінін өздері шешетін көрінеді. Және ол да №6 мектеп қабырғасында өтеді деп жоспарлануда. Бүгінде ақылы емтиханнан жүзден жоғары ұпай жинағандар саны 30 түлекті құраған. Олардың қатарында №19 жалпы орта білім беретін мектептің 11-ші сынып оқушысы Заманбек Сайлау аудан бойынша ең жоғары, яғни, 133 ұпай жинап, ұстаздарының абыройын асқақтатты. Ал №1 мен №8 жалпы орта білім беретін мектеп оқушылары Меруерт Ізберген мен Меруерт Айжарық 131 ұпайға қол жеткізсе, №4 пен №5 жалпы орта білім беретін мектеп түлектері Айназ Бекмағұл мен Нұрайлым Нұрлыбаевалар 130 ұпайды еншіледі. Ортақ нәтижеге сүйенсек, өңірде өз білімімен өзгелерден оқ бойы оза шауып келе жатқан қаракөз қыздардың қарасы көп. Бұл олардың өміріндегі алғашқы маңызды сынаққа бейжай қарамай, асқан жауапкершілікпен дайындалып жүргенін білдіреді.
- Ақылы сынақтан 131 ұпай жинағанымды білгенде не қуанарымды, не жыларымды білмедім. Себебі бұл әлі соңы емес. Жоғары ұпай алған соң маған артылатын үміттің де бұрынғыдан бетер арта түсетінін біліп, арқамды кеңге салуға әлі ерте екенін түсіндім. Бүгінде «JUZ40» онлайн курсымен ҰБТ-ға дайындығымды жалғастырып жатырмын. Қазір ҰБТ-дағы маған қиынға түсіп тұрғаны – тарих пәні. Себебі онда 6-11 сынып аралығында өткен барлық тақырып қамтылған. Сол үшін емтиханға дайындықты үзбей, жиі қайталап отыруымыз қажет. Алдағы уақытта мемлекеттік тесттен де жақсы нәтиже көрсетсем, өзім қалаған Алматы қаласындағы Қазақ ұлттық қыздар педагогикалық университетіне немесе Абай атындағы Қазақ ұлттық педагогикалық университетіне оқуға түскім келеді. Өзіме әдебиет пәні ұнайды. Сондықтан қазақ тілі мен әдебиеті пәнінің мұғалімі мамандығын меңгеруді жоспарлап отырмын,-дейді №1 жалпы орта білім беретін мектептің оқушысы Меруерт Ізберген.
Аудан түлектерінің бұл нәтижесі болашақ түлектер үшін үлкен мотивация болары сөзсіз. Себебі жоғары ұпай – олардың қажырлы еңбегі мен білімге деген құштарлығының дәлелі. Алда мемлекеттік грант иегері атануға мүмкіндік беретін негізгі ҰБТ сынағы күтіп тұр. Көкейге қобалжу ұялататын сынақ кім-кімге болмасын оңай соқпасы анық. Десек те, талапкерлерге тек сәттілік тілейміз!
Д.ІЗБАСАРҚЫЗЫ
* Суретте: ҰБТ-дан 133 ұпай жинаған №19 орта мектеп оқушысы Заманбек САЙЛАУ
