Оның әрбір сөзі – көңіл көгіне сәуле құйған шұғыла, әрбір өлеңі – жүректерге жол тартқан даналық әуені. Уақыт алмасқанымен, Абай мұрасы – мәңгілік. Сол асыл мұраны ұрпақ санасына сіңіру, ақынның ой биігін ұғындыру – бүгінгі буынның рухани парызы. Жуырда аудандық Орталық кітапхана ұлы ақын Абай Құнанбайұлының 180 жылдығына орай, оның рухани мұрасын ұлықтау мақсатында республика көлемінде 3 тамыз күні «Абай мұрасы - халық даналығы» атты әдеби кеш ұйымдастырды. Іс-шара Нұрсая саябағында, ашық аспан астында болды.
Абай Құнанбайұлының қазақ халқының ұлы ақыны, ойшылы, ағартушысы екенін білмейтін адам жоқ шығар. Ол өз шығармалары арқылы елді ғылым мен білімге, рухани тазалық пен әділеттілікке шақырды. Абайдың поэзиясы мен “Қара сөздері” адамзаттық құндылықтарды насихаттап, бүгінгі күнге дейін өзектілігін жоғалтқан емес. Міне, осындай руханият пен ұлттық болмыстың кейіпкеріне айналған Абай Құнанбайұлы үшін «10 тамыз - Абай күні» болып белгіленген. Бұл күн – ұлттың ұлы тұлғасының мұрасын ұлықтап, оның идеяларын жүрекпен ұғынатын ерекше рухани мереке.
Ашық аспан астында өткен бұл шарада Абайдың өмір жолы мен әдеби мұрасы жайлы мазмұнды мәліметтер ұсынылып, қатысушылардың рухани көкжиегі кеңейді. Айта кету керек, кеш бір ғана бағытпен шектелмей, бірнеше мазмұндық арнада өрбіді. Бұл өз кезегінде көрермендердің қызығушылығын арттыра түсті. Алдымен кітапхананың әдіскерлері шараны ашып, Абайдың өмірі мен шығармашылығы жайлы кеңірек мағлұмат берді. Одан кейін ақын шығармашылығына арналған кітап көрмесі таныстырылып, қатысушылар арасында Абай туралы қызықты сұрақтар қойылды. Белсенділік танытып, сұрақтарға дұрыс жауап берген оқырмандарға кітапхана атынан арнайы сыйлықтар табысталды. Бұған қоса, балаларға арнап тоғызқұмалақ ойыны ұйымдастырылып, ұлттық мұра мен ақыл-ой қатар насихатталған.
Осындай бірнеше бағытта өрбіген мазмұнды шараның мәні мен маңызын тереңірек ұғынып, кештің қалай өткенін білу мақсатында кітапхананың әдіскері әрі кеш жүргізушісі Бибісара Ерболатқызы Сабыровамен тілдескен едік:
- Иә, бұл шараны өткізу арқылы жастар арасында Абайдай ұлы тұлғаны дәріптеуді мақсат еттік. Қазіргі жастар үшін жай ғана шара өткізу жеткіліксіз. Сондықтан кешті тек ақпарат беру бағытында емес, қызықты әрі жан-жақты мазмұнда ұйымдастыруға тырыстық. Дәлірек атап өтсем, кітапхананың белсенді оқырмандары Мансұр Ысқақов, Жания Смағұлова, Саламат Темірбеков ақынның өлеңдерін жатқа оқыса, кітапханашы Жадыра Амирбаева, Алтынгүл Төлебаевалар да Абай жырларын мәнерлеп оқып, көрерменнің жүрегіне әсерлі түрде жеткізді. Сонымен қатар, Абайдың отыз бірінші қара сөзіне арнап түсірілген бейнематериалымыз көрсетілді. Кеш қонақтары Қуанышбек Қаздарбаев пен Кәусар Артықбайлар да ашық микрофонда өздерінің өнерін қалың көрерменге паш етті. Мерейлі күн аясында анықтамалық-библиографиялық бөлім меңгерушісі Жанат Байгуршимова «Абай ақпарат айдынында» атты мазмұнды кітап көрмесін таныстырды. Кітап көрмесі арқылы Абайдың шығармалары мен өлеңдері жұртшылықтың санасында жатталып, оқырмандардың ерекше қызығушылығын туғызды. Кеш соңында оқырмандар арасында «Абайды таны» атты интеллектуалды ойын ұйымдастырылып, дұрыс жауап бергендерге кітапхана атынан естелік сыйлықтар табысталды,- деді кітапхана әдіскері.
Расында, бұл кеш оқырманға тек бір сәттік әсер ғана емес, Абай мұрасының тереңдігін сезінуге әрі қазақ әдебиетінің болмысын түсінуге мүмкіндік берді десек, артық айтқандық болмас. Сондықтан Абайды тануға, оның даналыққа толы ой-толғамдарын ұғынып, өсиетін өмірге жолсерік етуге ұмтылу - әрқайсымыздың азаматтық әрі рухани парызымыз.
Әйгерім ҒАЛЫМЖАН
