Ауданымызға көп жыл еңбек еткен белгілі азамат Ғалимов Манап Ғалимұлы бүгінде 85 жасқа толар еді.
Көп жылдар Жылыой ауданында мәдениет саласында басшылық етті. «Еңбек ардагері», «Ерлік еңбек үшін» медальдары мен Құрмет грамоталары, басқа да марапаттарға ие болды. Ауданның ұлттық халық аспаптар оркестрін құрып, сонау Алматыға апарып, осы өнер ұжымын республика халқына танытты. Адал еңбегімен, абзал қасиетімен жастарға тәлім-тәрбие, үлгі берді.
Үлкенге ізетті, кішіге қамқор болды. Адам өміріндегі бас құндылықтың бірі – жанұя. Зеріп апа Манап ағаның өмірлік жан жолдасы, берік тірегі, әулетінің әрі мен шаңырактың сәні болды.
Ұлды - ұяға, қызды – қияға қондырып, ұрпақтарын өрбітіп, оқытып-тоқытып өсірді. Сөйтіп тату-тәтті тірлігімен, берекелі бірлігімен қалың жұртка үлгі болған Манап ағанын жанұясы ұлағатты отбасының бірі болды. Әрдайым есіктері меймандарына ашык, мол дастарханы жаюлы. Бір күні ағамызға әдеттегідей амандасып барғанбыз. Мен ол кезде аудандық АХАЖ бөлімінің меңгерушісімін. Кешкі шай дастарханы жайылып, жайдары бір отырыс басталды. Әсерлі әңгімелер айтылып, домбыраның күмбірлеген даусы да төгіліп жүре берді. Он саусағынан күй саулап, қос ішекті домбырада жүйткитін ағамыздың үйінде күй тартылып, ән шырқалмаса несі қызық! Әңгіме арасында ағамыздың көңілді жайма-шуақ сәтіп пайдаланып бұйымтайымды да айтып қалдым. Манап ағама «ауданға бірнеше су жана ақ түсті жеңіл автокөліктер келіпті. Шіркін-ай, соның біреуі осы АХАЖ қызметіне берілсе. Осы көлікті гүлмен, қуыршақпен, шармен безендіріп, жас жұбайларды қуантсам нұр үстіне нұр болар еді» деп қалдым. Ол жылдарда қазіргідей қызметтік автокөліктерге көп адамдардың қолы жетпейтін еді. Сол бойда аға ештеңе демеді. Баска әңгімелер айтылып, артынан ұмытып кеткен болар деп ойладым. Бірнеше күннен кейін аға телефон соғып, «маған хабарласшы»,- деді.
Мен барсам, Манап аға аудан басшыларының атына АХАЖ кызметіне үйленетін жастарға автокөліктің керектігін дәлелдеп (ол кісінің сөз байлығы мол болатын) хаттың үлгісін дайындап койған екен. Осы сұраныс хатты аудан басшылары қолдап, АХАЖ қызметіне ақ түсті жаңа модельдегі «Москвич» автокөлігін бөлді. Сондағы қуанғанымызды көрсеңіздер! Аудан жастары үйлену тойлары кезде осы көлікті жалға алып жүрді. Көліктің қат мезгілі. Бірақ әр үйленіп жатқан жастар тойларын барынша есте қалатын етіп өткізгенді тәуір көреді. Қалыңдығын әсем безендірілген көлікпен салтанатпен ата-анасына әкелгенді жөн көреді. Не керек, сол «Москвич» талай жастың үй болып, шаңырақ көтерген бақытты сәттерінің куәсі болып еді-ау!
Менің ойымды түсініп, жасап жүрген жұмысымды құрметтегені үшін, Манап ағама риза болып, шексіз алгысымды білдірдім. «Ата көрген оқ жонар» деп бекер айтылмаған. Манап ағаның артында Нұрсипат атты ұлы қалды.
Ол да әкесі Манап ағаға ұқсап, айналасын қамқорлап, қолынан келетін көмегін адамдардан аямайды. Үлкен өнегелі отбасы. Ұлағатты ұрпақ бүгінде ата-анасының жолдарын жалғастыруда.
Зәуре ҚАЛМҰХАНОВА,
Жылыой ауданының Құрметті азаматы
