Жұмыстың жалпы ұзақтығы 11 айға созылса, оған бөлінетін қаражат мөлшері 3 млрдтан астам деп көзделген.
Жуырда «Жол активтерінің ұлттық сапа орталығы» Республикалық Мемлекеттік кәсіпорнының облыстық филиалы директоры Бекбол Мұқашов ауданымызға іссапармен келді. Кәсіпорын филиалы басшысының сөзінше, аудандық тұрғын үй-коммуналдық шаруашылығы, жолаушылар көлігі, автомобиль жолдары және тұрғын үй инспекциясы бөлімімен жасалған келісімшартқа сәйкес биыл ауданның тас жолдарының сапасын бақылауға 18 млн қаражат бөлінген.
Алайда, тиісті жұмыстар тендерлік процесстерге байланысты кеш басталып отыр. Үстіміздегі жылдың шілде айында Жаңа Қаратон кентіне жол салу үшін конкурс ұйымдастырылған болатын. Нәтижесінде жергілікті «КазкомСервис» ЖШС жеңімпаз атанып, қазіргі таңда кент ішінде 30 шақырымнан астам көшеаралық жолдардың құрылысы басталды. Қазіргі таңда бастапқы жерді тегістеу жұмыстары жасалуда. Жұмыстың жалпы ұзақтығы 11 айға созылса, оған бөлінетін қаражат мөлшері 3 млрдтан астам деп көзделген. Дегенмен, қаржы алдағы уақытта бөлінетін болады. Бірақ, жеңімпаз мекеме қаражаттың әлі бөліне қоймағанына қарамастан, уақыт созбай, тезірек іске көшуді жөн көрген.
Ал сапаға жауапты кәсіпорынның облыстық филиалы директорының аудандағы жұмыс сапары осы Жаңа Қаратон кентінен бастау алды. Жұмыстың қызу қайнап жатқан ортасына барып, бақылау шараларын жүргізіп, жолдың ең төменгі қабатына төселетін қиыршық тас, малта тас, топырақ секілді материалдардан сынама алып, зерттеу жұмыстарын жүргізу үшін зертханаға жолдады. Сынама нәтижесі алдағы уақытта дайын болады деп күтілуде. Сондай-ақ, облыстан келген жол сапасын бақылаушылар құрылысы әлі бастала қоймаған Құлсары қаласының орталық көшесіндегі және жаңадан салынып жатқан қаламыздағы «Атырау» ықшамауданының тас жолдарының да орнын көріп, жай-күйін біліп қайтты. Болашақта іске асатын жұмыс жоспарларымен танысты.
«Жол активтерінің ұлттық сапа орталығы» Республикалық Мемлекеттік кәсіпорнының облыстық филиалы директорының сөзінше, ауданда сапасы сын көтермейтін, проблемалық жолдар да жоқ емес көрінеді. Ол Құлсары қаласының сыртындағы Атыраудан Маңғыстау облыстарының аудандарына қатынайтын айналма жол болып шықты. Қаладағы Махамбет даңғылы бойындағы орталық көше жолын жаңғырту мәселесі көптен бері жергілікті тұрғындар тарапынан айтылып келеді. Себебі, жергілікті халық жолдың сапасыздығынан көліктеріне зақым келгенін айтып шағымданады.
Бүгінде Құлсары қаласындағы Махамбет даңғылы бойындағы орталық көшеге жол салу жұмыстарын жүргізуге конкурс жарияланып, жол салатын мердігер мекеме белгілі болды. Енді екінші ұйымдастырылған конкурсқа сәйкес техникалық қадағалау шараларын жүзеге асыратын мердігер мекеме анықталса, тиісті қаражат бөлінсе, осы жылы қыркүйек айының соңына қарай жалпы ұзындығы 2,2 шақырым жол салына бастайды деп жоспарланып отыр. Орталық жол жаяу жүргіншілерге арналған жолмен қоса қайта жаңғыртылып салынбақ. Оған кететін уақыт 7 ай, ал бөлінетін қаражат сомасы 797 млн болмақ.
Сондай-ақ, Құлсары қаласындағы жаңа «Атырау» ықшамауданына да 22,1 шақырым жол құрылысын жүргізетін мекеме анықталды. Нәтижесінде, қаладағы орталық жол мен аталған ықшамауданның жолын салуды бір мекеме қолға алатын болды. Көрсетілген 5 млрдтан астам қаржының 50 миллионы бөлінді дейді-аудандық тұрғын үйкоммуналдық шаруашылығы, жолаушылар көлігі, автомобиль жолдары және тұрғын үй инспекциясы бөлімінің мамандары.
Ш.МҰХТАРҚЫЗЫ
