«Қыс шанаңды жаз сайла». Газетіміздің өткен санында аудандық төтенше жағдайлар бөлімінің мамандары қысқа дайындық жұмыстарын тамыздың 15-інен бастап кеткенін хабарлаған едік. Енді, міне, аудан да бұл қызметке қызу кіріскені көрініп тұр. Қазірдің өзінде Құлсары қаласындағы көпқабатты ықшамаудандарды жылытатын Орталық жылу қазандығына жөндеу жұмыстары басталып кеткен. Бұл жоспарлы іс-шаралар аудан бойынша тұрғын үй-коммуналдық және әлеуметтік сала объектілерін 2024-2025 жылдардың күзгі-қысқы жылыту маусымына дайындау мақсатында жүріп жатыр.
-Жылу қазандығының газ жанарғысы, насос және басқа да қосалқы бөлшектері ауысатын болады. Жөндеу жұмыстары аясында түтін шығарғыш мұржасы тазаланып, қапталды. Сонымен қатар жылу қазандығының ысырмаларын ауыстыру жұмыстары жүргізілуде,- дейді аудандық тұрғын үй-коммуналдық шаруашылығы, жолаушылар көлігі, автомобиль жолдары және тұрғын үй инспекциясы бөлімінің мамандары.
Жөндеу жұмыстарын аяқтау қыркүйек айының аяғына дейін жоспарланған.
