Жылыойлық отбасылар «Отбасы – бақыт мекені» атты мерекелік шарада құрметке бөленді

25 қазан – Республика күніне орай облыстың үлгілі отбасыларын ұлықтауға арналған «Отбасы – бақыт мекені» атты мерекелік шара өтті. Бұл іс-шара отбасы құндылықтарын кеңінен насихаттап, жанұя мен некенің жағымды үлгісін дәріптеу, отбасылар мәртебесін арттыру мақсатында ұйымдастырылды. Айтулы мерекеге Жылыой ауданының отбасылары да белсенді қатысып, айрықша құрметке ие болды.
Жылыойлықтар арасынан ерекше көзге түскен «Алтын той» иегерлері – Арыстановтар отбасы. Ұзақ жылдар бойы тату-тәтті өмір сүріп, өзара сыйластықтың үлгісін көрсетіп келе жатқан бұл жанұяға облыс әкімінің атынан құттықтау хат табысталды. Сондай-ақ, неке куәлігін енді ғана алған жас отбасы – Алдаберген Қабиев пен Ардақ Қазим де шарада марапатталып, көпшіліктің жылы лебізіне бөленді.
Сонымен қатар, биыл Жылыой ауданының «Мерейлі отбасы» атанған Құрмановтар отбасы да шараға қатысып, олар да алғыс хатпен марапатталды.