Жылыой аудандық мәдениет үйінің өнерпазы Бекет Аманқос «Әнші дауысы» облыстық жас орындаушылар ән байқауынан жүлделі ІІ орынды иеленсе, «Жайықтың жампоз жыраулары» облыстық жыршы-термешілер байқауынан жылыойлық Айбек Қабылбек бас жүлдеге ие болды, деп хабарлайды аудан әкімдігінің баспасөз қызметі.
Өнер додаларын Атырау облыстық мәдениет және тілдерді дамыту басқармасы мен облыстық халық шығармашылығы орталығымен бірлесе ұйымдастырған.
«Әнші дауысы» облыстық жас орындаушылар ән байқауы әуесқой жас әншілердің орындаушылық шеберлігін арттыру және қолдау көрсету мақсатында ұйымдастырылса, «Жайықтың жампоз жыраулары» облыстық жыршы-термешілер байқауы Атырау өңіріндегі дүлдүл жыраулар мен төкпе ақындар мұрасын келешек ұрпаққа насихаттап, жыр-терме айту өнерінің ізін қалыптастыру мақсатында өткізіліп отыр.
Жылыойлық өнерпаздарды кезекті жеңісімен құттықтай отыра, шығармашылық шабыт тілейміз!
