Өңірімізде өзінің өжеттілігімен, өзгеге ұқсамайтын ой-пікірімен, көзқарасымен көзге түсіп, қарапайым халықтың мұңын мұңдап, жоғын жоқтап, қоғамға пайдасын тигізіп жүрген белсенді әйел адамдар мен қыз-келіншектер аз емес. Олардың көпшілігі кешегі ел басына күн туған – көктемгі су тасқыны кезінде ерлермен бірдей ерекше көзге түсті. Жаны нәзік болса да, қайсар жүректі, қиындықтан қаймықпайтын құлсарылық қыздардың қатарында Жанаргүл Шарғабаеваның есімін айрықша атап өтуге болады. Жанаргүл Сағынбайқызының Құлсары қаласындағы №7 орта мектепте ұстаздық қызмет атқаратынын білсе де, көп адам оның өмірі мен еңбек жолынан бейхабар болуы мүмкін. Сондықтан кейіпкерімізді кеңірек таныстыру мақсатында ол туралы деректерді оқырман назарына ұсынғанды жөн көрдік.
Жанаргүл Шарғабаева қасиетті Тұрғызба топырағынан түлеп ұшқан жан. 1977 жылы қазіргі Жем ауылдық округінде дүниеге келіп, М.Әуезов атындағы №4 орта мектепте білім нәрімен сусындаған. Бала кезінен ұстаздық жолға бүйрегі бұрып, аңсары ауған жас түлек 1997 жылы арман қуып Атырау қаласындағы Қ.Дүтбаева атындағы гуманитарлық колледжіне оқуға түседі. Оны бастауыш сынып мұғалімі мамандығы бойынша тәмамдап, алғашқы еңбек жолын Құлсары қаласындағы №16 Д.Жазықбаев атындағы орта мектепте бастайды. 2014 жылы Ақтөбе қаласындағы С.Бәйішов атындағы университетке түсіп, білімін тереңдеткен ол 2002 жылдан бері №7 Е.Халықов атындағы орта мектепте еселі еңбек етіп келеді. Ширек ғасыр бойына ел ертеңінің жүрегіне білім шырағын жағып, тәрбие бесігін тербетіп келе жатқан ұстаздың ауданның білім беру саласының дамуына қосқан үлесі орасан зор. Бүгінгі күні педагогикалық шеберлік санаты бар педагог-зерттеуші, мектепте коуч, тренер және ментор қызметтерін де қоса атқарып келеді. Аудандық, облыстық деңгейлердегі жетістіктерін санамаған күннің өзінде республикалық байқауларда да жеңісті жетістіктерге жетіп, қанжығасын бірнеше мәрте майлап қайтты.
Атап айтар болсақ, «Педагогикалық идеялар» фестивалі мен «Алтын тұғыр» олимпиадасынан қоланы қанжығалап, облыстың намысын абыроймен қорғады. Кезіндегі Білім министрі К.Шамшидинованың және қазіргі Оқу-ағарту министрі Ғ.Бейсембаевтың Құрмет грамотасымен марапатталған. Одан бөлек білім саласына қосқан елеулі үлесі үшін облыс, аудан әкімдерінің Алғыс хаттарымен де ұлығыланды. Қоғам белсендісі ретінде Жанаргүл Шарғабаева өткен жылғы көктемгі су тасқыны кезінде ерекше көзге түсті. Қазақтың қайсар қызына тән мінезімен қиындыққа қасқайып қарсы тұрып қана қойған жоқ, жұртшылықты, әсіресе жастар жағын жұдырықтай жұмылдыра білді. Ауданға еліміздің жан-жағынан ағылып келіп жатқан гуманитарлық көмектерді қабылдап, ұйымдастыру, үйлері суға кетіп, тасқыннан зардап шеккендерге үлестіру кезінде ерен еңбектің үлгісін көрсетті. Ел басына күн туған ауыр кезеңдерде алғы шепте болған Жанаргүлдердің арқасында Құлсары халқы қиындықты еңсеріп, ауыртпалықтан арылды. Ауданның төтенше жағдайы кезіндегі қажырлы еңбегі үшін Жанаргүл Шарғабаева облыстық қоғамдық кеңестің «Қоғам жанашыры» медалімен марапатталды.
Иә, «Ұстаздық еткен жалықпас, үйретуден балаға» деп ұлы Абай айтқандай, бар саналы ғұмырын өңірдің білім саласына сарп етіп келе жатқан Жанаргүл Шарғабаеваның алар асулары әлі де алда. Оның ел алдындағы еңбегін қалай мақтан тұтсақ та жарасады. Ол мектепте – ұлағатты ұстаз, өңірде – қоғам белсендісі, ал отбасында – асыл жар, аяулы ана! Өмірлік жолдасы Жалғас Қамысбаевпен бірге бақытты ғұмыр кешіп келеді. Жанұяда бес бала тәрбиелеп өсірген ол немерелерінің аяулы әжесі де атанып үлгерді. Бір жақсысы - қызы Гүлдана да анасының жолын қуып, ұстаздық қызметті таңдады.
Ендеше, «инемен құдық қазған» шәкірттеріне білімнің мол қазынасын сыйлаған ұлағатты ұстаз, қоғам белсендісі, аяулы ана, әдемі әйел Жанаргүл Шарғабаеваны көктемнің керемет мерекесімен шын жүректен құттықтап, ел үшін сіңірген еңбегіне алға қарай да жеміс, отбасына өлшеусіз бақыт тілейміз.
Е.АЛТАЙҰЛЫ
