Жылыой ауданының ауылдарында соңғы кездері ерекше көңіл-күй байқалады. Көшелерде құрылыс қызған: бір жерде бағана қондырылып жатса, енді бір жерде жасыл аллеяның қазығы қағылып жатыр. Алдағы күз айларында мұнда 16 жаңа нысан ашылады – балалар алаңы, спорттық тренажерлер, демалыс орындары және т.б.
«Атам еккен ағаш – бүгінде ауылдың саясына айналуда»
Қосшағыл ауылында ерекше жоба қолға алынды. Ауыл тұрғыны, 25 жастағы жас ана Арайлым Мейірхан аллеяны салуға белсене кіріскен. Қазір ол екі баласына қарап үйде отырса да, бастаманы қолына алуды өзіне парыз санайды.
– «Алты жыл бұрын осы әулетке келін боп түскенімде, атамыз еккен жас шыбықтарды көрдім. Кәдімгі жас көшеттер еді. Бүгінде жайқалып өсіп, ауылдың шырайына айналды. Әкеміз осыдан жеті-сегіз жыл бұрын бұл жерді әкімдіктен сұрап алып, жалғыз өзі егіп, баптап жүрген. Енді біз жолдасым екеуміз сол аманатты жалғастырып, ауылдың саябағына айналдырмақпыз», – дейді ол.
Бұл істі ауыл тұрғындары да қуанышпен қарсы алған. Жас отбасының «Атамыздың еңбегі ел игілігіне жараса екен» деген тілектері орындалмақ.
150-ден астам кеңістік – ауыл өміріндегі үлкен өзгеріс
Қосшағыл ауылындағы Арайлымның бастамасы – Жылыойдағы жалғыз үлгі емес. Бұдан бөлек, жаңа қоғамдық кеңістіктер Ақкиізтоғай, Шоқпартоғай, Тұрғызба, Майкөмген ауылдық округтері мен Жаңа Қаратон кентінде бой көтеруде.
Бұл нысандар «Qogamdyq Keńıstikter» жобасы аясында жасалып жатыр. Жобаны жүзеге асыратын – Орталық Азияның Еуразия қоры (ОАЕҚ), ал қаржылай қолдау көрсетіп отырған – «Теңізшевройл» компаниясы. Жоба аясында Атырау және Маңғыстау облысының аудандарында осы күнге дейін 150-ден астам қоғамдық кеңістік салынып, ауылдардың ажарын ашып қана қоймай, тұрғындардың өмір салтын өзгертуге ықпал етті.
«Ауылдың болашағы үшін»
Ақкиізтоғай ауылында «Толағай» воркаут алаңы бой көтеріп жатыр. Оның бастамашысы – Мұхтар Шолан. Жергілікті тұрғын өз ауылына үлес қосуды азаматтық парыз санайды.
– «Былтыр балалар ойын алаңын салып едік. Биыл жастарға арналған спорт аймағын қолға алдық. Біздің ынталы топта он алты адам бар. Қатарымызда зейнеткерлер де, жастар да бар. Әркім қолынан келгенінше көмектесуде. Қазір қоршау мен қондырғыларды орнату жұмыстары аяқталды. Қаладан әкелінген құрылғылардың жартысы орнатылды. Ендігі сырлау жұмыстары басталғалы тұр», – дейді Мұхтар.
Оның айтуынша, ауылда жастарға арналған спорт орны жоқтың қасы. Жаңа алаң сол олқылықтың орнын толтырмақ. «Бұл – тек спорт алаңы емес. Бұл – жастардың басын қосып, салауатты өмір салтын қалыптастыратын орта», – дейді ол.
Қауымдастық қуаты – ауылдың жаңарған бейнесі
Соңғы жылдары Жылыой ауданының ауылдарында айтарлықтай серпін байқалады. Бұрын басталған игі істер бүгінде қарқын алып, тұрғындар жыл сайын ауыл игілігіне жарайтын жаңа жобаларды ұсынып келеді. Қоғамдық кеңістіктер құруға атсалысатындардың қатары көбейіп, әр ауылда белсенді топтар қалыптасты.
«Qogamdyq Keńıstikter» жобасының ерекшелігі: грант ұтып алған тұрғын ауылдастарын ұйымдастырып, ынталы топ құрады. Бөлінген қаржы тек құрылғылар мен қажетті материалдарға жұмсалады. Ал құрылыс, орнату, абаттандыру жұмыстарының барлығы – ауыл азаматтарының өз қолымен жасалады.
Жаңа алаңдар кейін әкімдіктің теңгеріміне өтсе де, ауыл адамдары оны өз қолымен салғаннан кейін жауапкершілікпен қарайды. Өйткені бұл тұрғындар үшін – жай ғана құрылыс емес, болашаққа жасалған ортақ еңбек.
«Бұл – біздің ауыл үшін жасаған еңбегіміз!»
Күз айларында Жылыойдың әр ауылында бос жатқан жердің орнында балалардың күлкісі естілмек. Жастар доп қуып, үлкендер көлеңкелі саябақта серуендейтін күн де алыс емес. Сол сәтте жобаға атсалысқан әр тұрғын жүрегінде бір ғана мақтанышпен: — «Бұл – біздің ауыл үшін жасаған еңбегіміз!» — деп айтары сөзсіз.
Ақмоншақ Әбілхасова
