Қазақстанда "Цифрлық ҚҚС" пилоттық жобасы іске қосылды, - деп хабарлайды Tengrinews.kz.
Жоба 2024 жылдың төртінші тоқсанынан бастап Мемлекеттік кірістер комитеті мен Ұлттық банкпен бірлесіп жүзеге асырылып жатыр.
Цифрлық теңге – бұл блокчейн технологиясына негізделген ұлттық валютаның жаңа түрі, ол қаражатты тек нақты мақсаттарға пайдалануға мүмкіндік береді.
Белгіленген цифрлық теңгені басқа мақсаттарға жұмсау немесе қолма-қол ақшаға айналдыру мүмкін емес – бұл қаражат тек жеткізушілермен және бюджетпен есеп айырысу үшін қолданылады. Барлық транзакциялар туралы ақпарат Ұлттық банк арқылы Мемлекеттік кірістер органдарына беріледі.
Бұл механизм ҚҚС-ты қысқа мерзімде қайтаруға мүмкіндік береді, сонымен қатар салықтық тәуекелдерді азайтады.
Цифрлық теңгенің негізгі артықшылықтары:
- ҚҚС қайтару мерзімі 55-75 күннен 15 жұмыс күніне дейін қысқарады.
- Салықтық тексерулер болмайды, бұл әкімшілік және қаржылық шығындарды азайтады.
- Қаржы айналымы жылдам әрі кепілді, бұл бизнес үшін қаржылық жоспарлауды жақсартады.
Пилоттық жобаға қатысушылар 2024 жылдың IV тоқсанында ҚҚС-ты 5 күн ішінде қайтарды.
Жоба тиімділігін көрсеткендіктен, Мемлекеттік кірістер комитеті цифрлық шешімдерді кеңейтуді жоспарлап отыр, бұл салық түсімдерінің ашықтығын арттырады.
