Қазақстан Республикасының аумағында тұратын әрбір адамның белгілі бір құқықтары мен міндеттері болады. Еліміз Конституциясының 33-бабына сәйкес осындай құқықтардың бірі - Қазақстан Республикасы азаматтарының жеке өтініш жасауы. Сондай-ақ жеке және ұжымдық өтініштерді мемлекеттік органдар мен жергілікті өзін-өзі басқару органдарына жіберу құқығы да бар.
Бұл өтініштер жеке және заңды тұлғалардың өз құқықтарын, бостандықтары мен заңды мүдделерін қорғаудың маңызды институттарының бірі ретінде қарастырылуы керек. Азаматтардың өтініштері - «кері байланыс», болып жатқан оқиғалар, процестер туралы өз пікірін білдіруі, жетілдіру жөнінде ұсыныстар енгізу және өздерінің өзге де құқықтары мен мүдделерін іске асыру мүмкіндігі.
Мемлекеттік органдар жұмысының тиімділігін және азаматтардың өтініштерін қараудың ашықтығын арттыру мақсатында Қазақстанда «Электрондық өтініш» енгізілді. 2021 жылдан бастап Мемлекет басшысының «Еститін мемлекет» тұжырымдамасын іске асыру мақсатында мемлекеттік органдардың азаматтардың жұмыс істеу тәсілі өзгерді.
Бүгінгі таңда egov.kz порталында құрылған электронды жолданымдардың «е-Оtinish» ақпараттық жүйесі бұл мәселелерді шешуге көмектесуде.
Электрондық жолданым беру үшін egov.kz порталына тіркеліп, электрондық цифрлық қолтаңба болуы қажет. Бұл - заңды күшіне енген Әкімшілік рәсімдік-процестік кодекс (ӘРПК) аясында қаралатын азаматтардың барлық өтініштеріне арналған бірыңғай ақпараттық жүйе. Электрондық жолданымдардың маңызды артықшылықтары – арыз-шағымды үйден шықпай немесе мобильді қосымша арқылы мемлекеттік органға жіберу мүмкіндігімен бірге жеке кабинет арқылы нақты уақыт режимінде оның қаралу барысын бақылап, қадағалауға да қолайлы жағдай туады.
2024 жылдың өткен уақыты мен 2023 жылдың сәйкес кезеңімен салыстырғанда келіп түскен өтініштердің көбеюі - «e-Otinish» АЖ-ның шағымдар мен өтініштерді беру тәртібін айтарлықтай жеңілдеткенінің дәлелі. Бұл ретте, ӘРПК өтініштерді қарау тәртібін егжей-тегжейлі реттеп, әкімшілік органдарға қосымша талаптарды белгілейді. Атап айтқанда, істің барлық мән-жайын зерделеп, жауапқа қанағаттанбаған жағдайда шағымдану тәртібін түсіндіреді. Сонымен қатар, жолданым берушінің талаптарын қанағаттандырудан бас тартылған жағдайда, мемлекеттік орган жолданым берушіге тыңдау рәсімі арқылы (бейнеконференц байланыс, басқа да ақпараттық жүйелер мен байланыс құралдары арқылы) өз ұстанымын білдіру мүмкіндігін беруге міндетті.
Қазір жолданымдарды қарау мерзімдері қысқартылды. Осылайша арыз негізінде қозғалған әкімшілік іс жүргізу мерзімі күнтізбелік отыз күннен он бес жұмыс күніне дейін азайтылып, ал шағымды қарау небәрі 20 жұмыс күніне дейін қысқартылды. Және де, азаматтар мемлекеттік органның шешімімен келіспесе, сотқа жүгінер алдында әкімшілік актісіне немесе әкімшілік әрекеті үшін (әрекетсіздігіне) шағым жасалып жатқан органға немесе жоғары тұрған органға шағымдануы тиіс.
Азаматтардың өтініштерін есепке алуды және тіркеуді бақылауды Қазақстан Республикасы Бас прокуратурасының Құқықтық статистика және арнайы есепке алу жөніндегі Комитеті жүзеге асырады.
Жанна Абдрахманова, республикалық Құқықтық статистика және арнайы есепке алу жөніндегі
Комитеттің Атырау облысы бойынша департаментінің өтініштерді
талдау және бақылау бөлімі бастығы, әділет кеңесшісі
