Газетіміздің өткен санында хабарлағанымыздай, аудан орталығындағы көп қабатты үйлердің қасбетінде тарихи тұлғалардың бейнесі бой көтере бастады. Онда Жылыой топырағында дүниеге келген есімі елге мәлім қаламгер, ақиық ақын Меңдекеш Сатыбалдиевтың, әдебиеттанушы ғалым Қабиболла Сыдиықов пен тұңғыш қазақ әліпбиінің авторы, ұлы ағартушы ұстаз, ақын Ахмет Байтұрсыновтың тұлғасы менмұндалап тұр. Жанында ұрпаққа қалдырған ұлағатты сөздері де қоса берілген.
Құлсары қаласының көшелеріне көрік қосып тұрған бұл жоба аудан әкімі Жұмабек Қаражановтың идеясымен жүзеге асуда. Тарихи тұлғалардың суретін Т.Жүргенов атындағы өнер академиясының түлектері Мейірбек Бақтиярұлы, Асылбек Бақтияр және Мирас Жанғожиев сынды талантты жастар салуда. Бұл өнер түрі бейнелеу өнерінің монументалды кескіндеме жанрына жатады. 2017 жылдан бастап Атырау қаласында танымал болған кескіндеме кейіннен қала, аудандарға да кең таралды. Суретшілердің айтуынша, суреттер композиция қиындығына, ауа райына, үйлердің биіктігіне байланысты 3-5 күн аралығында салынуда. Ал аудан әкімінің орынбасары Гүлнафис Айшуақованың сөзіне сүйенсек, бұл жұмыстар мердігер мекеме ЖК «Талант» арқылы жүзеге асуда. 1,5 жыл бұрын жүзеге асуы керек игі бастама жуырда ғана, яғни наурыз айынан бастап қолға алынған.
- Қала орталығындағы 5 көп қабатты үйдің қасбеті қазақтың ұлы тұлғаларының бейнелері мен дана сөздерімен безендірілуде. Қазіргі таңда 4 тұлғаның суреті толықтай аяқталды. Оның ең алғашқысы І ықшам аудан қасбетіне салынған – Кеңес Одағының батыры, даңқты батыр Бауыржан Момышұлы еді. Соңғысы Ұ.Абдрахманов көшесіне жергілікті ақын, жазушы Аманқос Ершуовтің суреті салынады. Алдағы уақытта Құлсары қаласының кіреберісіне де орналастырар жақсы жоспарымыз бар. Оны уақыты келгенде көре жатарсыздар. Бұл жобалар қаланың көрікті келбетін арттырып қана қоймай, ұлттық құндылықтарымызды насихаттауға және өскелең ұрпаққа рухани тәрбие беруге бағытталған,-дейді өз сөзінде Гүлнафис Аязберікқызы.
Әрине, алып суреттер кім-кімнің де болмасын рухын оятып, жігер беретіні сөзсіз. Себебі біз мәңгі ұлығылап өтетін ұлы тұлғалардың суреттерінің тұсына даналыққа толы сөздері жазылған. Онда Ахмет Байтұрсынов «Адамға тіл, құлақ қандай керек болса, білім де сондай керек» деп аудан жастарын оқып, білуге шақырса, Бауыржан атамыз «Тәртіпсіз ел болмайды, тәртіпке бағынған құл болмайды» деп жасөспірімдерді тәртіпке, бірлікке шақырып тұрғандай.
Д.ІЗБАСАРҚЫЗЫ
