Зағип жандарға қамқорлық жасау - әрбір азаматтың адами борышы. Оларды қоғамнан шеттетпеу үшін өңірімізде көптеген игі шаралар жүзеге асып келеді. Соның бірі - жақында Атырау қаласында «Қазақ соқырлар қоғамы» қоғамдық бірлестігінің облыстық филиалының ұйымдастыруымен Ұлыстың Ұлы күні - Наурыз мерекесіне орай зағип және нашар көретін жандар арасында өткен «Наурыз-берекем, Наурыз-мерекем» атты облыстық байқау.
Оған әр ауданнан үш өнерпаз, бір жетекшіден қатысты. Біздің ауданның үміткерлері қызу дайындықпен келгендігін көрсетті. Байқаудың негізі шарттары да осал болмады. Қатысушылар «Қолөнер» бөлігінде өз қолдарымен жасаған түрлі бұйымдарын көрсетіп, таныстырды. Одан кейінгі «Сұрақ-жауап» айдарында сұрақтар жазылған қағаздан біреуін суырып, салт-дәстүр тақырыбында берілген сауалдарға жауап іздеді. Келесі кезектегі байқаудың шарты - күй тарту еді. Яғни, үміткер өнерпаз кез келген күйшінің бір шығармасын нақышына келтіріп орындап шығуы керек.
Біздің өңірден қатысқан жылыойлық қоғам мүшелері өздерінің тапқырлығымен және өнерімен қазылар алқасын таңдай қақтырды. Айталық, қолөнер бұйымдарын ортаға шығарып, жұртшылыққа кеңінен таныстырған Бағыт Масалимова әжемізге, «Сұрақ-жауапқа» мүдірмей, толыққанды жауап берген Дүйсәлі Қалдыбай атамызға және қазақтың қоңыр домбырасымен құдіретті күйді күмбірлетіп, қазылар алқасын тәнті еткен Еркін Сүйешев ағамызға көрермен үлкен қошеметпен қол соқты. Сөйтіп біздің қоғамның тапқыр да, талантты мүшелері өзге ауданнан оза шауып, жүлделі І орынды қанжығаға байлап қайтты.
Әрине, осындай байқаулар арқылы зағип жандар қоғамға бейімделіп, өздерін қоршаған ортаның толыққанды азаматы ретінде сезінеді. Бұл өз кезегінде оларға жасалған қамқорлықтың тағы бір көрінісі деп есептеймін.
Саламат Темірбеков,
«Қазақ соқырлар қоғамы» қоғамдық бірлестігінің аудандық өкілі
