ҚР Ұлттық қауіпсіздік комитетінің Атырау облыстық департаменті мен Атырау облысы полиция департаменті қызметкерлері жедел іздестіру шарасын ұйымдастырды Атырау облысы полиция департаменті таратқан ақпаратта, қала аумағында Өзбекстан азаматынан ақша бопсалаған екі тұрғын ұсталғандығы хабарланған.

«24 тамыз күні полицияға Өзбекстан азаматы арызданып, белгісіз екі азаматтың 500 мың теңге көлемінде ақша бопсалағаны туралы айтқан. Полицейлер ҰҚКД қызметкерлерімен бірлесіп, жедел-іздестіру шарасы барысында Атырау қаласының 1983 жылы туған тұрғыны мен Жылыой ауданының 1979 жылы туған тұрғынын ұстады. Айғақ зат ретінде ұсталғандардың автокөлігінен бопсалап алған ақша табылды», делінген таратылған хабарламада.

- Ұсталғандардың бірі Жылыой ауданының бұған дейін бірнеше рет сотталған тұрғыны тергеу абақтысына, екіншісі үй қамаққа алынды. Қазіргі уақытта Қылмыстық кодекстің «Бопсалау» бабы бойынша сотқа дейінгі тергеп-тексеру жүргізілуде. Сонымен қатар, тексеру кезінде ұсталған екеудің деструктивті діни ағым ұстанушылары екені анықталды, – деп атап өтті департаменттің баспасөз қызметінде.