Атырауда мұнай-газ саласындағы жасанды интеллект тақырыбына арналған Қазақстандағы алғашқы форум өтіп жатыр. Форум жұмысына облыс әкімі Серік Шәпкенов қатысты.
Аймақ басшысы өз сөзінде мұнай-газ саласындағы ең ірі жобалардың Атырау облысында жүзеге асырылып жатқанын және өңірде айтарлықтай тәжірибе барын атап өтті. Бұл салада енгізілген ІТ-жобаларға да қатысты. Бүгінде өңірде «ақылды кен орындары», «ақылды жабдықтар» жүйелері енгізілуде. Кәсіпорындардағы цифрландыру деңгейі 30 пайыздан асты.
– Еліміздегі ең ірі мұнай-газ жобалары Атырау облысында іске асты. Жүзеге асырылып жатқан жобалар да бар. Міне, солардың ауқымы мен күрделілігінің арқасында жергілікті және қазақстандық компаниялар бірегей тәжірибе жинақтап, кәсіби командалар қалыптастырды, заманауи технологияларды игерді. Бүгінде бұл кәсіпорындар жаңа жобаларға атсалысып, саланың дамуына елеулі үлес қоса алатындай құзырет пен ресурсқа ие. Сондықтан алдағы жобаларды іске асыруда басымдықты отандық компанияларға беріп, қазақстандық үлестің деңгейін арттыру аса маңызды. Бұл ұлттық бизнестің позициясын нығайтып қана қоймай, саланы одан әрі цифрландыруға негіз бола алады. Осы тұрғыда форумда қабылданған шешімдер заманауи технологияларды кешенді енгізуге және мұнай-газ секторын дамытуға ықпал ететіні анық, – деді Серік Шәпкенов.
«Қазақстан мұнайсервис компаниялары одағы» (KazService) ұйымдастырған форум мемлекет, бизнес және IT-қоғамдастық өкілдері жасанды интеллект шешімдерін енгізу және мұнай-газ саласын цифрландырудың болашағын бірге талқылаған еліміздегі алғашқы ауқымды алаңға айналды.
