Отанын тек бір жыл сарбаз болып қана емес, сардар ретінде де қорғап, өмір бойына еліме қызмет атқарамын деген жастардың аз еместігіне сенеміз. Ондай жігіттер үшін республиканың кез келген жеріндегі әскери бөлімдерден келісімшарт негізінде қызмет орны дайын. Қазіргі таңда Қазақстан Республикасының Қарулы Күштер қатарына әскери қызметке іріктеу жұмыстары жүргізілуде.
Еліміздің Қорғаныс министрінің тапсырмасына сәйкес, оған жасы 35-ке дейінгі запастағы офицерлер мен 19-30 жасқа дейінгі әскери борышын өтеген, денсаулығы жарамды ер-азаматтар қабылданады.
Қазақстан Республикасының 2012 жылғы 16 ақпандағы №561-VI «Әскери қызмет және әскери қызметшілердің мәртебесі туралы» заңына сәйкес әскери қызметшілерге көптеген жеңілдіктер қарастырылған. Айталық, ай сайын тұрақты ақшалай үлес және қосымша сыйақы уакытылы төленеді. Бұл әскери атағына, атқаратын лауазымы мен сыныптылығына қарай, құпиялылығына сәйкес беріледі. Тегін пәтермен қамтамасыз етіліп, әскери қызметшілердің өздері мен отбасы мүшелерін де жергілікті медициналық мекемелерде емдеудің ақысыз түрі қарастырылған. Негізгі демалыс беру кезінде екі лауазымдық айлықақы мөлшерінде сауықтыруға жәрдемақы төленіп, жылдық еңбек демалысы 30-40 күнге созылады. Жыл сайынғы негізгі демалысынан басқа қосымша жоғары білім алу үшін және жанұя жағдайына байланысты демалыстар да беріледі. Әскери қызметшілердің балаларына, тұрғылықты жерінен мектепке дейінгі балалар мекемелерінде (балабақшада) кезектен тыс орын бөлініп, ай сайын коммуналдық өтемақы да аударылып тұрады. Бір сөзбен айтқанда, әскери қызметші толықтай мемлекет тарапынан қамтамасыз етіледі.
Әрине, мұндай жеңілдікке толы қызмет түрі қай-қай жасты да қызықтырары сөзсіз. Олай болса, толық ақпарат алу үшін аудандық қорғаныс істері жөніндегі бөліміне (телефон: 5-12-47, 5-01-69) хабарласып, мән-жайды білуге болады.
Тұрлан Сәденов,
аудандық қорғаныс істері жөніндегі бөлім бастығы
