Мұсылман қауымы үшін екі ұлық мереке бар. Соның бірі - Ораза айт. Күн найза бойы көтерілгенде «Алланың үйіне» қадам басқан жылыойлықтар да бұл күнді лайықты қарсы алуға асықты. Бұл күні аудандық орталық мешіттен бастап, барлық жерде мерекелік шаралар ұйымдастырылып, еңбектеген баладан еңкейген кәріге дейін керемет көңіл-күйге бөленді.
Ораза айт намазына асыққандар үшін орталық мешітте ұстаз Демирел Мақсотұлы уағыз айтып, Ораза айт күнгі әдептерді түсіндірді. Жиналған жамағаттың қарасы өте көп болып, «Алла үйіне» сыймаған жұрт мешіт сыртындағы аула ішіне тізе бүкті. Намаздан соң құтпа оқылып, аудандық мешіттің бас имамы Жасұлан Қуанышұлы мінберге шығып, ел-жұрттың амандығы үшін дұға қылды. Мешіт ауласы маңына киіз үй құрылып, айттап келгендерге ақ дастархан жайылды. Сол жерде балаларға мерекелік сыйлықтар таратылып, ересектер арасында ұлттық ойыннан сайыс өтті. Ауыл ақсақалдары жастарға батасын беріп, ізгі тілегін жеткізді. Иә, тамаша көрініс, әйтсе де айттық мұнымен аяқталмады.
Қаламыздың әр жерінде балаларға арнап батут құрылып, сыйлықтар берілді. Осыған орай кейбір мейрамханалар акциялар ұйымдастырып, бүлдіршіндер үшін тәттілер таратты. Ең үлкен айттық шара Құлсарының III ықшам ауданында болды. Онда киіз үй тігіліп, мерекелік ас берілді. Жергілікті жастардың ұйымдастыруымен балаларға 5 батут құрылып, кішкентайларға балмұздақ үлестірілсе, үлкендер ақ дастархан басына жайғасты. Жасөспірімдер арасында қазақ күресінен сайыс өтіп, жеңімпаздар арнайы сыйлық пен дипломмен марапатталды. Ал, ерлер арасындағы спорттық сайыс нағыз айқасқа айналды. Аудандық турнирден кем түспеді. Әсіресе, қазақ күрестегі қоян-қолтық белдесулер жұрттың делебесін қоздырды. Одан бөлек арқан тартыс, қол күресі, кір тасын көтеру, қой көтеруден жарыстар өтті. Жарыс соңында эстафеталық додада жеңіске жеткендер медаль және кубокпен мадақталды. Әсіресе, оқ бойы озып келген «Сұңқар» тобы алтыннан алқа тағынып, ұлықталды.
Ораза айтқа орай қаладағы «Арай» мейрамханасында 300 адамға арналған ақ дастархан жайылып, мешіттің бас имамы Жасұлан Қуанышұлы:
- «Отыз күн оразаның бір айты бар. Әр жақсылықтың бір қайтымы бар» деп, қазақ атамыз айтқандай, исі мұсылманға ұлық мереке саналған Ораза айтымыз баршамызға құтты болсын. Аман-есен айттан айтқа, Рамазаннан Рамазанға жете берейік,-дей келе, Ораза айт мерекесі хақында уағыз айтып, қалың көпшілікті құттықтады. Мерекелік шара барысында ұлттық ойындар ойналып, интеллектуалды куиз ойыны өтті. Оның ішінде арқан тартыс, ағашқа шеге қағу, үлкен аяқ киіммен жүгіру, шар үру сияқты ойындар көпті разы қылды.
Иә, кешегі кеңестік дәуірде ұмыт қалған салт-дәстүріміз бен діни мерекеміз қайта жаңғырып, ұлт пен ұлысты, көрші мен ағайынды бірлік пен татулыққа шақыратын мейрамдарымыз осылай ерекше тойлануда. Көрісу күнінен басталған мерекелік шаралар көші Ораза айтпен аяқталып, жылыойлықтарға жарқын көңіл-күй сыйлады.
Е.АХМЕТКӘРІМОВ
