Қазақ халқының Наурызды тойлау дәстүрі бір күнмен шектелмеген. Елімізде Мемлекет басшысы Қасым-Жомарт Тоқаевтың бастамасымен ұлттық мерекені тойлаудың жаңа форматы бекітілді. Бұл – Наурызнама онкүндігі.
Наурызнама онкүндігі 14 наурыз - Амал мерекесіне байланысты «Көрісу – бірлік пен берекенің бастауы» тақырыбында төл мейрамның мән-мағынасын ашатын ақпараттық-танымдық сағатымен басталды. Шара өнер ұжымдарынан құралған өнерпаздардың мерекелік концертімен және салт-дәстүрлік қойылымдармен жалғасты.
Шаңырақ күніне орай «Өнегелі отбасы-ел мерейі» атты шарада аудан жастарының үлгілі отбасылармен кездесуі ұйымдастырылды. Оған Жылыой өңірінде есімі құрметпен аталатын өнегелі Гайдар Арыстанов пен Жаңылсын Аманжолова әулеті, отбасы құндылығы мен татулығын басты назарда ұстайтын Жарылғасын Керуенов пен Әлия Қойбақованың жанұясы және 12 ұл-қыз өсіріп, тәрбиелеген көп балалы Бақтығали Нұрғазиев пен Күнсұлу Шықыбаеваның отбасылары шақырылды.
18 наурыз - Ұлттық киім күні де өз деңгейінде атап өтілді. Аудан жұртшылығы арасындағы қолөнерді жалғастырушы шеберлердің шығармашылығына қолдау көрсету, ұлттық қолөнерді дамыту мен жандандыру мақсатында «Ұлттық киім-ұрпаққа мұра» тақырыбында көрме-байқауы ұйымдастырылды.
Ұлыстың Ұлы күнінде музей алаңына киіз үй тігіліп, оның ішкі беті ұлттық нақышта безендірілді. Суретші Қ.Қыдыровтың жеке сурет көрмесі жасақталып, көрермен назарына ұсынылды. Қонақтар ұлттық салт-дәстүрге негізделген бесікке салу, тұсау кесу, балаға есім қою, сүйінші сұрау, көрімдік, байғазы беруден көрініс пен қойылымдарды тамашалады. Балалар арасында ұлттық ойындар - асық ату, ләңгі тебу, күш сынасу, арқан тарту өткізіліп, жеңімпаздар марапатталды.
Наурызнама онкүндігі аясында ұйымдастырылған барлық шаралар музейге келген аудан тұрғындарына ерекше қуаныш сыйлап, қазақтың дәстүрі мен мәдениетін құрметтеуге шақырды.
Гүлжауһар Мейрамқызы,
кіші ғылыми қызметкер,
«Атамұра» музейі
